பாகுபலி படத்தில் வெற்றிக்கு பிறகு அனுஷ்கா மீதான கிரேஸ் ரசிகர்களிடம் இன்னும் அதிகரித்தது. இதை தொடர்ந்து அவர் இன்னும் பல படங்களில் நடித்து ரசிகர்களை மகிழ்விப்பார் என நினைத்தால் பாகுபலி படத்தை தொடர்ந்து அவர் நடித்த சில படங்கள் பெரிய அளவில் வரவேற்பை பெறவில்லை.
கடந்த சில வருடங்களாக அவர் நடித்து பெரிய அளவில் படங்களும் வெளியாகவில்லை. இந்த நிலையில் ஒரு சிறிய இடைவெளிக்குப் பிறகு தெலுங்கில் அனுஷ்கா நடிப்பில் மிஸ் ஷெட்டி மிஸ்டர் பொலிஷெட்டி என்கிற திரைப்படம் விரைவில் வெளியாக இருக்கிறது.
இந்த படத்தில் கதாநாயகனாக நவீன் பொலிஷெட்டி என்பவர் நடித்துள்ளார். இந்த படம் தமிழிலும் வெளியாக இருக்கிறது. இந்த நிலையில் இந்த படத்தில் இடம் பெறும் ஹதவிடி என்கிற பாடலை நடிகர் தனுஷ் தெலுங்கிலேயே பாடியுள்ளார். தமிழில் என்னடா நடக்குது என்கிற பாடலாக அவரது குரலிலேயே இது வெளியாகிறது.
இந்த பாடல் சமீபத்தில் வெளியாகி ரசிகர்களின் வரவேற்பை பெற்றுள்ளது. நடிகர் தனுஷ் தமிழில் தொடர்ந்து பல படங்களில் பாடி வருகிறார். தெலுங்கில் ஏற்கனவே அவர் பாடி இருந்தாலும் ஒரு சிறிய இடைவெளிக்கு பிறகு இந்த படத்தில் பாடியுள்ளார் என்பது குறிப்பிடத்தக்கது.
இந்த படத்தை மகேஷ்பாபு என்பவர் இயக்கியுள்ளார். ரதந என்பவர் இசையமைத்துள்ளார்.