சூப்பர் ஸ்டார் ரஜினிகாந்த் நடிப்பில் வெளியான படங்கள் அவ்வப்போது டிஜிட்டலுக்கு மாற்றப்பட்டு ரீ ரிலீஸ் செய்யப்பட்டு வெளியாவது தொடர்ந்து வருகிறது. இதற்கு முன்னதாக சிவாஜி, பாபா, பாட்ஷா உள்ளிட்ட படங்கள் டிஜிட்டலுக்கு மாற்றப்பட்டு ரீ ரிலீஸ் செய்யப்பட்டு மிகப்பெரிய வரவேற்பையும் வசூலையும் பெற்றன.
பெரும்பாலும் சூப்பர் ஸ்டார் ரஜினியின் ஹிட் படங்கள் அதிலும் ரசிகர்களுக்கு நன்கு தெரிந்த படங்களே இப்படி டிஜிட்டலுக்கு மாற்றி ரீ ரிலீஸ் செய்யப்பட்டு வந்தன.
இந்தநிலையில் தற்போது கிட்டத்தட்ட 40 வருடங்களுக்கு (1982) முன்பு அவர் நடித்த தனிக்காட்டு ராஜா என்கிற படம் தற்போது டிஜிட்டலுக்கு மாற்றப்பட்டு வரும் ஜூன் இரண்டாம் தேதி ரீ ரிலீஸ் செய்யப்பட இருக்கிறது.
இந்த படத்தை இயக்குனர் வி.சி.குகநாதன் என்பவர் இயக்கியுள்ளார். கதாநாயகிகளாக ஸ்ரீதேவி, ஸ்ரீபிரியா ஆகியோர் நடிக்க, வில்லனாக மக்கள் கலைஞர் ஜெய்சங்கர் நடித்துள்ளார். கவிஞர் வாலி பாடல்கள் எழுதிய இந்த படத்திற்கு இசைஞானி இளையராஜா இசையமைத்துள்ளார்.
இந்த படத்தில் இடம் பெற்ற சந்தனக் காற்றே மற்றும் ராசாவே உன்ன நான் எண்ணித்தான் ஆகிய பாடல்கள் படம் வெளியான சமயத்தில் பட்டி தொட்டி எங்கும் பட்டையை கிளப்பியதுவுடன் இப்போதும் ரசிகர்களின் பாடலாக விளங்குகின்றன.