வருடத்திற்கு 150 க்கும் குறையாமல் படங்கள் வெளியாகி வருகின்றன. இதில் பெரிய நடிகர்களின் படங்களை தவிர்த்து விட்டு ஓரளவு அறிமுகமான நடிகர்கள் மற்றும் புதுமுக நடிகர்கள் ஆகியோரின் படங்களில் வெற்றிபெறும் படங்கள் என பார்த்தால் அவற்றை விரல் விட்டு எண்ணிவிடலாம்.
அந்த வகையில் கடந்த வருடம் இயக்குனர் பிரதீப் ரங்கநாதன் கதாநாயகனாக நடித்து இயக்கியிருந்த லவ் டுடே திரைப்படம் மிகப்பெரிய வெற்றியும் வசூலையும் பெற்றது. அவரை அனைவருக்கும் தெரிந்த ஒரு கதாநாயகனாகவும் மாற்றியது.
அதேபோல இந்த வருடம் துவங்கி ஒரு மாதமே முடிந்துள்ள நிலையில் தற்போது விஜய் டிவி மற்றும் பிக்பாஸ் புகழ் கவின் நடித்துள்ள டாடா என்கிற திரைப்படம் வெளியானது. படம் வெளியான முதல் நாளிலிருந்து ரசிகர்களிடம் பாசிட்டிவான விமர்சனங்களையும் பாராட்டுகளையும் இந்த படம் பெற்று வருகிறது.
இந்த படத்தை கணேஷ் கே பாபு என்பவர் இயக்கியுள்ளார். இந்த படத்தின் வெற்றி எந்த அளவிற்கு உறுதிப்படுத்தப்பட்டுள்ளது என்றால் இந்த படத்தின் இயக்குனர் கணேஷ் கே பாபுவிற்கு லைக்கா நிறுவனத்தில் புதிய படம் இயக்கும் ஜாக்பாட் வாய்ப்பு கிடைத்துள்ளது. இதற்கான ஒப்பந்தமும் போடப்பட்டு அதிகாரப்பூர்வ அறிவிப்பும் வெளியாகி உள்ளது
உச்ச நட்சத்திரங்கள், பெரிய இயக்குனர்களின் படங்களை மட்டுமே தயாரித்து வரும் லைக்கா நிறுவனம் தற்போது டாடா பட இயக்குனருக்கு தங்களது நிறுவனத்தில் படம் இயக்கும் வாய்ப்பை கொடுத்துள்ளது திரையுலகில் மிகப்பெரிய ஆச்சரியத்தை ஏற்படுத்தியுள்ளது.