விஜய் டிவி சீரியலில் நடித்து பின்னர் பிக்பாஸ் நிகழ்ச்சியில் கலந்து கொண்டு பிரபலமானவர் நடிகர் கவின். அதனை தொடர்ந்து நட்புன்னா என்னன்னு தெரியுமா, லிப்ட் உள்ளிட்ட படங்களில் நடித்திருந்தார். இருந்தாலும் சமீபத்தில் வெளியான டாடா என்கிற படம் மிகப்பெரிய வெற்றியை பெற்றதுடன் அதில் கதாநாயகனாக நடித்த கவினுக்கு மிகப்பெரிய திருப்புமுனையாகவும் அமைந்துவிட்டது.
இதைத் தொடர்ந்து நல்ல படைப்புகள் அவரைத் தேடி வருகின்றன. இது ஒரு பக்கம் இருக்க தமிழ் சினிமாவில் டான்சராக நுழைந்து பின்னர் இயக்குனராக மாறி சில படங்களில் நடிகராகவும் தலை காட்டியவர் டான்சர் சதீஷ்.
தற்போது இவர் இயக்குனராகவும் உருவெடுத்து கவின் கதாநாயகனாக நடிக்கும் படத்தை இயக்குகிறார். இந்த படத்தை பிரபல தயாரிப்பு நிறுவனமான ரோமியோ பிக்சர்ஸ் தயாரிக்கிறது. இந்த படத்தில் கவின் கதாநாயகனாக நடிக்க அயோத்தி புகழ் பிரீத்தி அஸ்ராணி கதாநாயகியாக நடிக்கிறார்.
இவற்றிற்கெல்லாம் சிகரம் வைத்தாற்போல் இந்த படத்திற்கு அனிருத் இசை அமைக்கிறார். தற்போது உச்ச நட்சத்திரங்களான ரஜினி கமல் விஜய் உள்ளிட்டோரின் படங்களுக்கு இசையமைத்து வரும் அனிருத், கவின் சதீஷ் கூட்டணியில் உருவாகும் படத்திற்கு இசையமைக்கிறார் என்பதே இவர்களின் நட்புக்காக தான்.
அந்த வகையில் இந்த படம் கவின், சதீஷ் இருவரின் திரையுலக பயணத்தில் நிச்சயம் ஒரு மாற்றத்தை கொடுக்கும். இதற்கு முன்பாக பிரபுதேவா, ராகவா லாரன்ஸ் ஆகிய நடன இயக்குனர்கள் டைரக்சனில் தங்களது திறமையை வெளிக்காட்டி உள்ளனர். இதுபோல சதீஷும் டைரக்ஷனில் முத்திரை பதிப்பார் என எதிர்பார்க்கலாம்.