நடிகை திரிஷா சினிமாவில் நுழைந்து சமீபத்தில் தான் 20 வருடங்களை வெற்றிகரமாக தொட்டுள்ளார். அதற்கு மகுடம் சூட்டும் விதமாக சமீபத்தில் வெளியான பொன்னியின் செல்வன் 2 படத்தில் மீண்டும் அவரது நடிப்பிற்கு பாராட்டுக்கள் கிடைத்து வருகின்றன.
இன்னொரு பக்கம் லோகேஷ் கனகராஜ் இயக்கத்தில் விஜய்யுடன் பல வருடங்களுக்குப் பிறகு இணைந்து லியோ படத்தில் நடித்து வருகிறார் த்ரிஷா.
அதே சமயம் இதற்கு முன்னதாக திரிஷா கதையின் நாயகியாக நடித்திருந்த ராங்கி திரைப்படம் கடந்த சில மாதங்களுக்கு முன்பு வெளியானது. அதேபோன்று கதையின் நாயகியாக திரிஷா நடித்துள்ள இன்னொரு படம் தான் தி ரோடு.
இந்த படத்தை அறிமுக இயக்குனர் அருண் வசீகரன் என்பவர் இயக்கியுள்ளார். கதாநாயகனாக சந்தோஷ் பிரதாப் நடிக்க, முக்கிய வேடங்களில் சார்பட்டா பரம்பரை புகழ் டான்சிங் ரோஸ் சபீர், நடிகை மியா ஜார்ஜ், எம்.எஸ் பாஸ்கர், வேலராமமூர்த்தி, விவேக் பிரசன்னா உள்ளிட்ட பலர் இந்த படத்தில் நடித்துள்ளனர்.
சாம் சி எஸ் இந்த படத்துக்கு இசை அமைத்துள்ளார். இந்த படம் வரும் ஜூன் மாதம் வெளியாக இருப்பதாக தற்போது ஒரு தகவல் வெளியாகி உள்ளது.
மதுரை மற்றும் அதை சுற்றியுள்ள காட்டுப் பகுதிகளில் இந்தப் படத்தின் படப்பிடிப்பு நடைபெற்றுள்ளது. மதுரை பகுதியில் நடைபெற்ற ஒரு உண்மை சம்பவத்தில் அடிப்படையில் இந்த படம் உருவாக்கப்பட்டுள்ளதாக சொல்லப்படுகிறது.