லோகேஷ் கனகராஜ் இயக்கத்தில் இரண்டாவது முறையாக விஜய் நடித்து வரும் படம் லியோ. இந்த படத்தின் படப்பிடிப்பு கடந்த ஜனவரி மாதம் துவங்கி கிட்டதட்ட 50 நாட்கள் வரை காஷ்மீரில் உள்ள பல பகுதிகளில் நடைபெற்று தற்காலிகமாக நிறைவடைந்துள்ளது.
காஷ்மீரில் நாயகி திரிஷா, பிரியா ஆனந்த், கௌதம் மேனன், மிஸ்கின், வில்லனாக நடிக்கும் சஞ்சய்தத் உள்ளிட்ட பல முக்கிய நட்சத்திரங்கள் நடித்த காட்சிகள் அடுத்தடுத்து படமாக்கப்பட்டன. இந்த படத்தில் முதன்முறையாக விஜய்யுடன் இணைந்து நடித்துள்ளார் பிரபல வில்லன் நடிகரான பாபு ஆண்டனி.
கடந்த 80, 90களில் தமிழ் மற்றும் மலையாள திரை உலகில் கொடூர வில்லனாக வலம் வந்தவர் தான் இந்த பாபு ஆண்டனி. குறிப்பாக பூவிழி வாசலிலே, சூரியன் ஆகிய படங்களில் இவரது வில்லத்தனம் கலந்த நடிப்பு ரசிகர்களை வெகுவாக கவர்ந்தது,
அதன் பிறகு சமீப காலமாக விண்ணைத்தாண்டி வருவாயா, காக்கா முட்டை ஆகிய படங்களில் குணசித்திர கதாபாத்திரங்களில் நடித்த தனது இன்னொரு முகத்தையும் ரசிகர்களுக்கு காட்டி அதிலும் வரவேற்பை பெற்றார். இந்த நிலையில் தான் தற்போது லியோ படத்தில் முக்கிய கதாபாத்திரத்தில் நடித்துள்ளார் பாபு ஆண்டனி.
படப்பிடிப்பு தளத்தில் இவரிடம் பேசிய விஜய் இவரது படங்களுக்கு, இவரது நடிப்பிற்கு தான் ரசிகர் என்று கூற,மகிழ்ச்சியின் உச்சத்திற்கே சென்று விட்டாராம் பாபு ஆண்டனி. அதுமட்டுமல்ல படக்குழுவினர் பலரும் இவரது நடிப்பை பாராட்டியுள்ளனர்.
தற்போது லியோ படப்பிடிப்பு முடிந்து ஊர் திரும்பி உள்ள நிலையில் விஜய்யின் பணிவு, பெருந்தன்மை, அன்பு குறித்து ரொம்பவே சிலாகித்து கூறி வருகிறார் பாபு ஆண்டனி.