தமிழகம் முழுவதும் பட்டி தொட்டியெங்கும் நன்கு பிரபலமான சரவணா ஸ்டோர்ஸ் அதிபர் லெஜண்ட் சரவணன் ஏற்கனவே தனது கம்பெனியின் விளம்பர படங்களில் நடித்து ஒவ்வொரு வீட்டிலும் நன்கு அறிமுகமாகி உள்ளார். அதனை தொடர்ந்து தற்போது முதன்முறையாக வெள்ளித்திரையில் லெஜண்ட் என்கிற படத்தில் ஹீரோவாகவும் அறிமுகமாகியுள்ளார்.
அஜித், விக்ரம் இருவரும் இணைந்து நடித்த உல்லாசம் படத்தை இயக்கிய ஜேடி-ஜெர்ரி என்கிற இரட்டை இயக்குனர்கள் தான் இந்த படத்தை இயக்கி வருகிறார்கள். ஹாரிஸ் ஜெயராஜ் இந்தப்படத்திற்கு இசையமைத்துள்ளார் மும்பை நடிகை ஊர்வசி ரவுட்டேலா இந்த படத்தில் கதாநாயகியாக நடித்துள்ளார்
ஏற்கனவே மொசலே மொசலே மற்றும் வாடிவாசல் என இரண்டு லிரிக் பாடல்கள் வெளியாகி ரசிகர்களிடம் வரவேற்பை பெற்றுள்ளதுடன் யூடியூபில் ஒரு கோடி பார்வைகளையும் தாண்டி உள்ளது.
இந்தநிலையில் இந்த படத்தின் டிரைலர் மற்றும் இசை வெளியீட்டு விழா வரும் மே 29 ஆம் தேதி நேரு உள்விளையாட்டு அரங்கில் பிரமாண்டமாக நடைபெற இருக்கிறது.
இந்த நிகழ்வில் படக்குழுவினர் மட்டுமல்லாது தமன்னா, பூஜா ஹெக்டே, ஹன்சிகா, லட்சுமிராய் உள்ளிட்ட பல முன்னணி நடிகைகளும் சிறப்பு விருந்தினர்களாக பங்கேற்று பிரமாதப்படுத்த இருக்கிறார்கள்.
மறைந்த சின்ன கலைவாணர் விவேக் கடைசியாக நடித்த படமும் இதுதான். அதேபோல நடிகர் யோகிபாபு இந்த படத்தில் கதையின் நாயகனுடன் படம் முழுவதும் வரும் ஒரு கதாபாத்திரத்தில் நடித்துள்ளார்.
சாதாரண, அன்புள்ளம் கொண்ட ஒரு மனிதன் தனக்கு வரும் எதிர்ப்புகளை சமாளித்து எப்படி ஒரு லெஜன்ட் ஆகிறான் என்பதுதான் இந்த படத்தின் கதை. இந்த படம் பான் இந்தியா படமாக உருவாகி உள்ளது என்பது குறிப்பிடத்தக்கது.