ரசிகர்களை பொறுத்தவரை எப்போதுமே இயக்குனர் சுந்தர்.சி யின் படங்கள் வெளியாகிறது என்றால் அதை ஒரு காமெடி திருவிழாவாகவே கொண்டாட ஆரம்பித்து விடுவார்கள். ஹாரர் படமாக இயக்கினாலும் அதையும் காமெடி கலந்து இயக்குவது சுந்தர்சியின் பாணி. அந்தவகையில் அரண்மனை 3 படத்தைத் தொடர்ந்து தற்போது முற்றிலும் கலகலப்பாக குடும்ப பின்னணியில் சுந்தர் சி இயக்கியுள்ள படம் காபி வித் காதல்.
ஜீவா, ஸ்ரீகாந்த், ஜெய் என மூன்று ஹீரோக்கள் நடிக்கும் இந்த படத்தில் யோகிபாபு, அம்ரிதா ஐயர், மாளவிகா சர்மா, ஐஸ்வர்யா தத்தா, விஜய் டிவி டிடி, பிக்பாஸ் சம்யுக்தா, உள்ளிட்ட பலர் முக்கிய கதாபாத்திரத்தில் நடித்துள்ளனர்.
இந்த படத்திற்கு யுவன் சங்கர் ராஜா இசையமைத்துள்ளார் சீரான இடைவெளிகளில் வெளியாகி வந்த இந்த படத்தின் ஒவ்வொரு லிரிக் பாடல் வீடியோவும் ரசிகர்களிடம் வரவேற்பை பெற்றது.
இந்த நிலையில் இந்த படம் வரும் அக்டோபர் 7ஆம் தேதி உலகம் முழுக்க வெளியாகும் என அதிகாரப்பூர்வமாக அறிவிக்கப்பட்டுள்ளது.
இந்த படத்தின் தமிழக வெளியீட்டு உரிமையை உதயநிதி ஸ்டாலினின் ரெட் ஜெயன்ட் மூவிஸ் நிறுவனம் கைப்பற்றியுள்ளது.