கடந்த 1995ல் ஷங்கர் இயக்கத்தில் கமல் நடிப்பில் பிரம்மாண்டமாகவும் பிரமிக்க வைக்கும் விதமாகவும் வெளியான படம் இந்தியன். லஞ்சத்துக்கு எதிராக கிளம்பும் வயதான பெரியவர் கதாபாத்திரத்தில் கமல் வித்யாசமான தோற்றத்தில் அற்புதமான நடிப்பை வெளிப்படுத்தி இருந்தார்.
இந்த படத்திற்கு இப்போது தொலைக்காட்சியில் திரையிடப்பட்டாலும் மிகுந்த வரவேற்பு உள்ளது. இந்த நிலையில் இந்த படம் வெளியாகி கிட்டத்தட்ட 25 வருடங்கள் கழிந்த நிலையில், இரண்டு ஆண்டுகளுக்கு முன்பு இந்தியன் 2 படம் துவங்கியது. இந்த படத்தை லைகா நிறுவனம் தயாரித்தது.
சில நாட்கள் படப்பிடிப்பு நடந்த நிலையில் படப்படிப்பில் ஏற்பட்ட விபத்து, அதை தொடர்ந்து கொரோனா தாக்கம் ஆகியவை காரணமாக இந்த படம் நிறுத்தப்பட்டது. அதன்பிறகு கமல் விக்ரம் படத்தில் நடிக்க சென்றுவிட, இயக்குனர் ஷங்கர், தெலுங்கில் ராம்சரண் படத்தை இயக்க சென்றுவிட்டார்.
இதனால் பட தயாரிப்பு நிறுவனமான லைகா மற்றும் ஷங்கர் இருவருக்கும் உரசல் ஏற்பட்டது. இதைத் தொடர்ந்து படம் வெளிவராது அவ்வளவுதான் என்கிற பேச்சும் எழுந்தது. இந்தநிலையில் தான் கமலின் விக்ரம் திரைப்படம் மிகப்பெரிய வெற்றி பெற்றதுடன், மீண்டும் கமல் தான் இழந்த ஃபார்மை மீட்டுள்ளார். மேலும் இந்தியன் 2 நிச்சயம் உருவாகும் என்றும் கூறியிருந்தார்.
இந்த நிலையில் இன்று ஷங்கர் பிறந்தநாளை முன்னிட்டு அவருக்கு லைகா நிறுவனம் ட்விட்டர் பக்கத்தில் வாழ்த்துக்களை தெரிவித்திருந்தது. அதுமட்டும் அல்ல லைக்கா நிறுவனத்தின் சிஇஓ தமிழ் குமரன் இயக்குனர் ஷங்கரை நேரிலேயே சந்தித்து பிறந்தநாள் வாழ்த்துக்களை தெரிவித்துள்ளார்.
மேலும் நடிகர் கமலும் இயக்குனர் ஷங்கருக்கு பிறந்தநாள் வாழ்த்துக்கள் கூறியதுடன் இந்தியன் 2 வில் இணைந்து பயணிப்போம் என சூசகமாக கூறியுள்ளார். இதற்கு இயக்குனர் ஷங்கர் நிச்சயமாக என்று தனது நன்றியை தெரிவித்துக் கொண்டுள்ளார். இதையெல்லாம் பார்க்கும்போது இந்தியன் 2 திரைப்படம் மீண்டும் முழு வீச்சில் துவங்க உள்ளது என்பது தெரிகிறது.