இயக்குனர் மோகன் ஜி டைரக்ஷனில் செல்வராகவன் நடிப்பில் சில நாட்களுக்கு முன்பு வெளியாகி பரபரப்பை ஏற்படுத்திய படம் பகாசுரன். இந்த படத்தில் கதாநாயகிகளில் ஒருவராக நடித்து இருந்தவர் தாராக்ஷி. தற்போது இவர் சிங்கப்பூர் வாழ் தமிழ் மக்களுக்காக தயாராகி வரும் கப்பல் ஏறிய தமிழன் என்கிற வெப் சீரிஸில் கதாநாயகியாக நடிக்கிறார்.
இயக்குனர் சுரேஷ் கிருஷ்ணாவிடம் உதவி இயக்குனராக பணியாற்றிய கே எஸ் ஐ சுந்தர் இந்த வெப் சீரிஸை இயக்குகிறார். இதில் கதாநாயகனாக சிங்கப்பூரைச் சேர்ந்த விஜே ஜெய்கணேஷ் நடிக்கிறார். இந்த வெப் சீரிஸ்க்கு தேனிசைத் தென்றல் தேவா இசை அமைக்க பாடல்களை கவிஞர் வைரமுத்து எழுதுகிறார்.
இந்த நிலையில் தேவா இசையமைப்பில் வைரமுத்து பாடல் வரிகளில் ஒரு பாடல் எப்படி உருவாகிறது என்பதை நேரில் பார்த்து ரசிப்பதற்காக தேவாவின் ஒளிப்பதிவு கூடத்திற்கு வருகை தந்தார் தாராக்ஷி. அப்போது தேவா, வைரமுத்து இருவரிடமும் வாழ்த்துக்கள் பெற்றார் தாராக்ஷி.
இந்த தொடரின் படப்பிடிப்பு தற்போது துவங்கி உள்ளது. வெள்ளையர்களை எதிர்த்து 1940களில் நடந்த சுதந்திரப் போராட்டத்தில் பங்கேற்ற ஒரு தமிழனின் வரலாற்றை மையமாகக் கொண்டு இந்த தொடருக்கான கதை எழுதப்பட்டுள்ளது. தமிழ்நாட்டில் தொடங்கி சிங்கப்பூர் வரை இதன் கதை தொடர்கிறது.