தமிழ் சினிமாவில் ஹீரோக்கள் பல பேர் புதிது புதிதாக நடிக்க வந்தாலும் நகைச்சுவை நடிகர் பற்றாக்குறை என்பது தொடர்ந்து இருந்து கொண்டு தான் இருக்கிறது. யோகிபாபுவிற்கு பிறகு சொல்லிக் கொள்ளும்படியாக புதிய நகைச்சுவை நடிகர்கள் என பெரிய அளவில் யாரும் உருவாக வில்லை. கருணாகரன், காளி வெங்கட், சதீஷ், முனீஸ் காந்த் என வெகு சிலரே தற்போது நகைச்சுவை தேவையை நிறைவேற்றி வருகின்றனர்.
இந்த நிலையில் சமீபத்தில் ஹிப் ஹாப் ஆதி நடிப்பில் வெளியான வீரன் திரைப்படம் மூலம் நகைச்சுவை நடிகராக அறிமுகமாகியுள்ளார் சசி செல்வராஜ். இவர் ஏற்கனவே நக்கலைட்ஸ் என்கிற யூட்யூப் சேனல் மூலம் பல வீடியோக்களில் தனது நகைச்சுவை நடிப்பை வெளிப்படுத்தி ரசிகர்களுக்கு நன்கு அறிமுகமானவர்.
யூடியூபில் வெற்றி பெற்றாலும் கூட சினிமாவில் நடிப்பது சிலருக்கு செட்டாகாது. ஆனால் சசி செல்வராஜ் வீரன் படத்தில் அனைவரையும் சிரிக்க வைக்கும் விதமாக இயல்பான நடிப்பை வெளிப்படுத்தி இருந்தார். கொங்கு தமிழில் அவர் பேசும் பேச்சும் அவரது நகைச்சுவை நடிப்புக்கு கை கொடுத்தது.
அந்த வகையில் தமிழ் சினிமாவில் ஒரு நகைச்சுவை நடிகராக சசி செல்வராஜ் உருவெடுப்பதற்கான வாய்ப்புகள் அதிகம் இருக்கின்றன. சரியான கதைகளையும் கதாபாத்திரங்களையும் தேர்ந்தெடுத்து நடித்தால் அவருக்கு நல்ல எதிர்காலம் உண்டு என்பது தெரிகிறது.