டைட்டிலை பார்த்ததுமே என்ன 40 வருட நட்பு என்கிறார்களே, யோகி பாபு சினிமாவிற்கு வந்து பத்து வருடங்கள் தானே ஆகிறது என எந்த குழப்பமும் வேண்டாம்.. யோகிபாபு நடித்துள்ள படத்தின் டிரைலர் தான்.. ஆனால் இந்த படத்தின் கதையை எழுதி இருப்பவர் சூப்பர் ஸ்டார் ரஜினி நித்த 2 படங்களை இயக்கியவரும் 40 வருடத்திற்கு மேலாக அவரது நட்பில் இருப்பவருமான பிரபல இயக்குனர் விசி குகநாதன் தான்.
காவி ஆவி நடுவுல தேவி என டைட்டில் வைக்கப்பட்டுள்ள இந்த படத்தின் டிரைலரை சூப்பர் ஸ்டார் ரஜினிகாந்த் சமீபத்தில் வெளியிட்டார். இந்தப் படத்தின் கதாசிரியர் வி.சி.குகநாதன் இயக்குனர் புகழ்மணி, தயாரிப்பாளர் சங்க தலைவர் தென்டான்டால் பிலிம்ஸ் முரளி ராமசாமி, ஆகியோர் சூப்பர் ஸ்டார் ரஜினியின் இல்லத்திற்கு சென்று இந்த நிகழ்வில் கலந்து கொண்டனர்.
திரையுளவில் 55 வருட அனுபவம் கொண்டவர் வி.சி.குகநாதன். கிட்டத்தட்ட 25 படங்கள் வரை இயக்கியுள்ள இவர் 250 படங்களுக்கு மேல் கதை எழுதியுள்ளார். இப்போது டிரைலர் வெளியிடப்பட்டுள்ள இந்த காவி ஆவி நடுவுல தேவி திரைப்படம் இவர் கதை எழுதும் 275 ஆவது திரைப்படமாகும்.
கிட்டத்தட்ட 40 வருடங்களுக்கு முன் சூப்பர் ஸ்டார் ரஜினிகாந்த் வளர்ந்து வந்த சமயத்தில் அவரை வைத்து மாங்குடி மைனர், என்கிற படத்தையும் சூப்பர் ஹிட் ஆன தனிக்காட்டு ராஜா என்கிற ஆக்சன் திரைப்படத்தையும் இயக்கியவர் இந்த வி.சி.குகநாதன்.
ஸ்ரீகாந்த் தேவா இசையமைக்கும் இந்த படத்தின் ஒளிப்பதிவை கணேசனும் படத்தொகுப்பை ராஜ் கீர்த்தியும் மேற்கொண்டுள்ளனர்.
இந்த படத்தின் கதை பற்றி கதாசிரியரும் இயக்குனருமான வி.சி.குகநாதன் கூறும்போது, “இது நான் கதை எழுதும் 275வது படம். என்னுடைய 55 வருட திரையுலக அனுபவத்தில் ஒவ்வொரு படத்திலும் புதிது புதிதாக ஏதாவது ஒரு விஷயத்தை முயற்சிப்பேன். அந்த வகையில் காமெடி கலந்து இந்த படத்தின் கதையை உருவாக்கி உள்ளேன். நகரத்தில் மையப்பகுதியில் 3 சடலங்கள் தொங்க விடப்பட்டுள்ளன. கடத்தல், ரவுடியிசம் என அராஜகம் பண்ணிய இவர்களை கொன்றது யார் என போலீஸ் தீவிரமாக விசாரிக்கிறது. மருத்துவ பரிசோதனையில் கூட இவர்கள் கொல்லப்பட்டார்களா, தற்கொலை செய்து கொண்டார்களா என்கிற உறுதியான முடிவு தெரியாத நிலையில் போலீசார் குற்றவாளிகளை கண்டுபிடிக்க திணறுகின்றனர்.
அந்த பகுதியில் பாபா கேபிள் டிவியில் புலனாய்வு பத்திரிக்கையாளராக பணியாற்றும் அதிசயா என்கிற இளம்பெண், போலீசாரே கண்டுபிடிக்க திணறும் இந்த மூன்று கொலைகளை செய்தது யார் என்று நான் கண்டுபிடித்து மக்களுக்கு உண்மையை தெரியப்படுத்துவேன் என சவால் விடுகிறார். இந்த இரண்டு தரப்பில் யார் கொலையாளிகளை கண்டுபிடிக்கிறார்கள் என்பது தான் கதை. இதை முழுக்க முழுக்க நகைச்சுவை கலந்து கொடுத்திருக்கிறேன்.
தற்போது இந்தப்படத்தின் டிரைலர் வெளியாகியுள்ளது. சூப்பர்ஸ்டார் ரஜினிகாந்த் இந்த டிரைலரை பார்த்துவிட்டு ரொம்ப இன்ட்ரஸ்டிங்காக இருக்கு என்று பாராட்டி உள்ளார்” என்று கூறியுள்ளார். இந்த படத்தின் இறுதிக்கட்ட பணிகள் தற்போது விறுவிறுப்பாக நடைபெற்று வருகிறது.