சின்னத்திரையில் தொகுப்பாளராக வேலை பார்த்து தங்களது திறமையால் கொஞ்சம் கொஞ்சமாக சினிமாவிலும் முன்னேறியவர்கள் வெகு சிலர். சிவகார்த்திகேயன் அதில் முதலிடத்தில் இருக்கிறார். ரோபோ சங்கர், மகாபா ஆனந்த் உள்ளிட்ட சிலரும் அவ்வப்போது திரைப்படங்களில் நடித்து வருகின்றனர்.
அந்த வகையில் சின்னத்திரை தொகுப்பாளராக நிகழ்ச்சிகளை கலகலப்பாக நகைச்சுவையுடன் தொகுத்து வழங்கி வருபவர் விஜய் டிவி புகழ் ரக்சன். கடந்த இரண்டு வருடங்களுக்கு முன்பு வெளியான கண்ணும் கண்ணும் கொள்ளையடித்தால் படத்தில் துல்கர் சல்மானின் நண்பனாக படம் முழுவதும் வரும் கதாபாத்திரத்தில் நடித்திருந்தார் ரக்சன்.
அந்த படத்தில் அவரது காமெடி ரொம்பவே ஒர்க் அவுட்டாகி ரசிகர்களை கவர்ந்தது. இந்த நிலையில் காமெடி நடிகர்கள் ஹீரோவாகும் வரிசையில் ரக்சனும் இணைந்துள்ளார் தற்போது அவர் கதாநாயகனாக மறக்குமா நெஞ்சம் என்கிற படத்தின் மூலம் அறிமுகமாகிறார்.
இந்த படத்தை ரா.கோ.யோகேந்திரன் என்பவர் இயக்கி வருகிறார். மேலும் இந்த படத்தில் கலக்கப்போவது யாரு தீனா விசாகா திமான், உள்ளிட்ட பலர் நடிக்கின்றனர். பிரபல மலையாள இசையமைப்பாளர் சச்சின் வாரியர் என்பவர் இந்த படத்திற்கு இசையமைக்கிறார்.
உணர்வுபூர்மான காதல், நட்பு, உறவுகளை மையமாக கொண்டு, அனைவரும் ரசிக்கும் கமர்ஷியல் பொழுது போக்கு திரைப்படமாக இப்படம் உருவாகிறது. இந்த நிலையில் இந்த படத்தின் ஃபர்ஸ்ட் லுக் போஸ்டரை நடிகர் ஜெயம் ரவி வெளியிட்டுள்ளார்.
பள்ளியில் நடக்கும் விஷயங்களை மையப்படுத்தி இந்த படம் உருவாகி வருகிறது என்பது இந்த ஃபர்ஸ்ட் லுக் போஸ்டரை பார்க்கும்போது தெரிகிறது