தமிழ் சினிமாவில் முன் எப்போதும் நிகழ்ந்திராத ஒரு ஆச்சரியமாக இயக்குனர் ஷங்கர் தற்போது ஒரே சமயத்தில் கமல் நடிக்கும் இந்தியன் 2 படத்தையும் தெலுங்கில் ராம்சரண் நடித்துவரும் கேம் சேஞ்சர் என்கிற படத்தையும் மாறி மாறி இயக்கி வருகிறார். ஆரம்பத்தில் அவர் இந்தியன் 2 படத்தை தான் முதலில் துவங்கினாலும் கொரோனா உள்ளிட்ட பல காரணங்களால் அந்த படத்தின் படப்பிடிப்பு தள்ளிப்போனது.
இதைத் தொடர்ந்தே தெலுங்கில் ராம்சரண் படத்தை இயக்க ஆரம்பித்தார் ஷங்கர். ஆனால் கமலின் விக்ரம் படம் மிகப்பெரிய வெற்றி பெற்றதும் மீண்டும் இந்தியன் 2 படத்தையும் லைக்கா நிறுவனம் உடனே ஆரம்பிக்கும்படி கூறியது. இதனை தொடர்ந்து இரண்டு படங்களுக்கும் மாறி மாறி தேதி ஒதுக்கி படங்களை இயக்கி வருகிறார் ஷங்கர்.
அந்த வகையில் இந்த இந்த படங்கள் கிட்டத்தட்ட இறுதிக் கட்டத்தை எட்டி உள்ளன. இந்த நிலையில் தற்போது இந்த படங்களின் நிலை குறித்து புதிய அப்டேட் தகவலை இயக்குனர் ஷங்கர் வெளியிட்டுள்ளார்.
இதுபற்றி அவர் கூறும்போது, “கேம் சேஞ்சர் படத்தின் அதிரடியான கிளைமாக்ஸ் இன்று முடிவடைந்தது. மே 11 முதல் இந்தியன் 2 படத்தின் சில்வர் புல்லட் காட்சிகள் மீது கவனம் செலுத்த இருக்கிறேன்” என்று குறிப்பிட்டுள்ளார். இதன் மூலம் மே 11லிருந்து இந்தியன் படத்தின் இறுதிக்கட்டப் பணிகள் ஆரம்பிக்கின்றன என்கிற அப்டேட் தகவலை ஷங்கர் வெளியிட்டுள்ளதால் இந்தியன் 2 ரசிகர்கள் உற்சாகத்தில் இருக்கின்றனர்.