லோகேஷ் கனகராஜ் இயக்கத்தில் விஜய் நடிப்பில் உருவாகி வரும் படம் லியோ. மாஸ்டர் படத்தை தொடர்ந்து இவர்கள் இருவரும் மீண்டும் இணைந்து இருப்பதால் இந்த படத்திற்கான எதிர்பார்ப்பு இரு மடங்காகி இருக்கிறது. இந்த படத்தில் கதாநாயகியாக திரிஷா நடிக்கிறார். முக்கிய வேடங்களில் இயக்குனர்கள் மிஷ்கின் மற்றும் கௌதம் மேனன் இருவரும் நடித்து வருகின்றனர்.
கௌதம மேனன் சமீப காலமாக தான் நடிக்கும் படங்களில் அழுத்தமான முத்திரையை பதித்து வருகிறார். கடந்த மாதம் வெளியான விடுதலை படத்தில் கூட போலீஸ் உயர் அதிகாரி கதாபாத்திரத்தில் நடித்திருந்த அவரது நடிப்பு பலராலும் பாராட்டப்பட்டது. இந்த நிலையில் லியோ படத்தில் தான் நடித்த அனுபவம் குறித்து சில தகவல்களை பகிர்ந்துள்ளார் இயக்குனர் கௌதம மேனன்.
இது குறித்து அவர் கூறும்போது, “ஏற்கனவே விக்ரம் படத்தில் நடிப்பதற்காக லோகேஷ் கனகராஜ் என்னை அழைத்தார். அந்த சமயத்தில் சில காரணங்களால் நடிக்க முடியாமல் போனது. மீண்டும் தற்போது லியோ படத்தில் விஜய்யுடன் நடிக்க அழைப்பு வந்தபோது இதை விட்டுவிட விரும்பவில்லை.
இந்த படத்தில் விஜய்யுடன் முழு படத்திலும் பயணிப்பது போன்ற ஒரு கதாபாத்திரத்தில் நடித்துள்ளேன். அந்த அளவிற்கு முக்கியமான கதாபாத்திரம். அதேசமயம் இயக்குனர் மிஷ்கினுக்கும் எனக்கும் இடையே எந்த ஒரு காட்சியும் இல்லை” என்றும் கூறியுள்ளார் கௌதம் மேனன்.