அரசியல் குடும்பத்தில் வாரிசுகளாக திரையுலகில் களம் இறங்கியவர்கள் தான் உதயநிதி மற்றும் அருள்நிதி இருவரும். இதில் உதயநிதி ஆரம்பத்திலிருந்து காமெடி ஜானர் படங்களை தேர்ந்தெடுத்து அதில் பயணிக்க ஆரம்பித்தார். அவரது சகோதரர் அருள்நிதியோ வித்தியாசமான கதை, வித்தியாசமான முயற்சி கொண்ட படங்களுக்கு முக்கியத்துவம் கொடுத்து தனது பாதையை தேர்ந்தெடுத்தார்.
அந்த வகையில் தற்போது அருள்நிதி நடிக்கும் படங்கள் என்றால் அதற்கென்று ஒரு ரசிகர் கூட்டம் தனியாகவே இருக்கிறது. அந்த அளவுக்கு படத்தின் ஆரம்பம் முதல் இறுதி வரை விறுவிறுப்பாக நகரும் கதைக்களங்களையே தேர்ந்தெடுத்து நடித்து வருகிறார்.
கடந்த வருடம் வெளியான தேஜாவு, டைரி என இந்த இரண்டு படங்களை லேட்டஸ்ட் உதாரணமாக கூறலாம். அடுத்ததாக தற்போது அருள்நிதி நடிப்பில் வெளியாக இருக்கும் படம் திருவின் குரல்.
லைக்கா நிறுவனம் தயாரித்துள்ள இந்த படத்தை அறிமுக இயக்குனர் ஹரிஷ் பிரபு என்பவர் இயக்கியுள்ளார். இந்த படத்தில் முக்கிய கதாபாத்திரத்தில் இயக்குனர் இமயம் பாரதிராஜாவும் நடித்துள்ளார்.
இந்த நிலையில் தற்போது இன்று இந்த படத்தின் டிரைலர் வெளியாகி உள்ளது. அதுமட்டுமல்ல வரும் ஏப்ரல் 14ஆம் தேதி இந்த படம் வெளியாகும் என ரிலீஸ் தேதியும் தற்போது அறிவிக்கப்பட்டுள்ளது.