சமீபத்தில் சுந்தர்.சி இயக்கத்தில் வெளியான காபி வித் காதல் படத்தில் நடித்த ஜீவா நடிப்பில் அடுத்ததாக வெளியாக இருக்கும் படம் வரலாறு முக்கியம். இந்த படத்தை அவரது தந்தை ஆர்பி சவுத்ரியின் சூப்பர் குட் பிலிம்ஸ் நிறுவனமே தயாரித்துள்ளது.
இயக்குனர் சந்தோஷ் ராஜன் இயக்கியுள்ள இந்த படம் ரொமான்ஸ், காமெடி ஜானரில் கமர்சியல் திரைப்படமாக உருவாகியுள்ளது. இந்த படத்தில் கதாநாயகியாக காஷ்மிரா பரதேசி நடிக்கிறார்.
முக்கிய வேடங்களில் பிரக்யா நாக்ரா, VTV கணேஷ், K.S.ரவிக்குமார், மொட்ட ராஜேந்திரன், ஷாரா சரண்யா, டி எஸ் கே, சித்திக் மற்றும் பல நடிகர்கள் இணைந்து நடித்துள்ளனர்.
வரும் டிசம்பர் 9ஆம் தேதி இந்த படம் வெளியாக உள்ள நிலையில் படக்குழுவினர் பத்திரிகையாளர்களை சந்தித்து இந்த படம் குறித்த தங்களது அனுபவங்களை பகிர்ந்து கொண்டனர்.
அப்போது நடிகர் ஜீவா பேசும் போது சிவா மனசுல சக்தி படத்திற்கு பிறகு அது போன்று ஒரு படம் வேண்டும் என்று அனைவரும் என்னை கேட்டார்கள். அப்படி ஒரு படமாய் தான் இந்த வரலாறு முக்கியம் வந்துள்ளது. இந்த படத்தின் இயக்குனர் மிகவும் அதிகமான காமெடி உணர்வு உள்ளவர். அது படத்திலும் பிரதிபலித்துள்ளது. கோவிட் காலகட்டத்தில் தான் இந்த படத்தை உருவாக்கினோம்.
மக்கள் சந்தோஷமாக படம் பார்க்க வேண்டுமென இப்படத்தை உருவாக்கியுள்ளோம். ஹீரோயின் பிரக்யா மற்றும் காஷ்மீரா இருவருடன் பணியாற்றியது மகிழ்ச்சியை தருகிறது.
காஷ்மீரா இதில் மலையாளம் கலந்த தமிழ் பேசி அசத்தியுள்ளார். பிரக்யாவை முன்னதாகவே சோஷியல் மீடியா மூலம் தெரியும். அவருடன் பகிர்ந்துகொண்டதும், படபிடிப்பு தளத்திலும் மகிழ்ச்சியான அனுபவமாக இருந்தது” என்றார்.