முன்பு போல நேரடியாக தியேட்டர்களில் தான் தங்களது படங்கள் வெளியாக வேண்டும் என பிடிவாதம் பிடிக்கும் பழக்கம் பல தயாரிப்பாளர்கள், இயக்குனர்களிடம் குறைந்துவிட்டது. காரணம் கடந்த இரண்டு வருடங்களாக அவர்களுக்கு வரப்பிரசாதமாக கிடைத்துள்ள ஓடிடி தளங்கள் தான். அதனால் தங்களது படம் நன்றாக இருந்தும் அதற்கு சரியான அளவில் தியேட்டர்கள் கிடைப்பதில் சிக்கல் எழும்போது போட்ட அசலையும் ஓரளவு லாபத்தையும் சேர்த்து எடுக்கும் விதமாக கைகொடுக்கின்றன ஓடிடி தளங்கள். அந்த வகையில் தற்போது ஷ்ரத்தா ஸ்ரீநாத் நடித்துள்ள விட்னஸ் திரைப்படமும் நேரடியாக சோனி லிவ் ஓடிடி தளத்தில் வெளியாகிறது
தூய்மைப் பணியாளர்களின் வாழ்க்கையை மையமாகக் கொண்டு உருவாகி இருக்கும் “விட்னஸ்” திரைப்படம், பெருநகரங்கள் குறித்து நாம் இதுவரை கண்டிராத உண்மைகளையும், கண்ணுக்குப் புலப்படாத வகையில் அங்கே செயல்படும் அதிகார மையங்களையும் நமக்கு நெருக்கமாக கொண்டு வந்து சேர்க்கும் வகையில் அறிமுக இயக்குநர் தீபக் இயக்கி இருக்கிறார். மேலும், அவரே ஒளிப்பதிவாளராகவும் பணியாற்றியிருக்கிறார்
ஷ்ரத்தா ஶ்ரீநாத், ரோகிணி ஆகியோர் முன்னணி கதாபாத்திரங்களாக நடிக்க, அழகம்பெருமாள், சண்முகராஜா, ஜி. செல்வா, சுபத்ரா ராபர்ட், இராஜீவ் ஆனந்த் மற்றும் எம்.ஏ.கே.இராம் ஆகியோர் முக்கியமான கதாபாத்திரங்களாக நடித்துள்ளனர்.
இப்படத்திற்கான கதை மற்றும் திரைக்கதையை முத்துவேல் மற்றும் ஜே.பி.சாணக்யா ஆகியோர் இணைந்து எழுதியிருக்கிறார்கள் “தி பீப்பிள் மீடியா பேக்டரி” சார்பாக டி.ஜி.விஷ்வபிரசாத் தயாரிக்க, விவேக் குச்சிபோட்லா.இணைந்து தயாரித்துள்ளார்.
இத்திரைப்படம் தமிழ், தெலுங்கு, மலையாளம், கன்னடம், இந்தி ஆகிய ஐந்து மொழிகளில் வெளியாகிறது.