கடந்த பத்து வருடங்களில் எத்தனையோ அறிமுக நடிகர்கள் தமிழ் சினிமாவில் நுழைந்தாலும் வெகு சிலர் தான் இந்த பத்து வருடத்தில் தாக்குப்பிடித்து வெற்றிகரமாக தங்கள் பயணத்தை மேற்கொண்டு வருகிறார்கள். அதற்கு காரணம் அவர்கள் நடிப்புத்திறன் ஒரு பக்கம், நல்ல கதைகளை தேர்ந்தெடுத்து நடிப்பது இன்னொரு பக்கம் என கவனமுடன் தங்களது படங்களை தேர்வு செய்வது தான். அப்படிப்பட்ட ஒரு சில நடிகர்களில் நடிகர் அசோக் செல்வனும் ஒருவர்.
சமீபத்தில் இவர் மூன்று மாறுபட்ட கதாபாத்திரங்களில் நடித்திருந்த நித்தம் ஒரு வானம் திரைப்படம் வெளியாகி ரசிகர்களிடம் வரவேற்பை பெற்றுள்ளது. இந்த நிலையில் தனது வெற்றிக்கு பக்கபலமாக நிற்கும் பத்திரிக்கையாளர்களை சந்தித்து நன்றி தெரிவித்தார் அசோக் செல்வன்.
அப்போது அவர் கூறும்போது, “நான் சினிமா பின்புலம் இல்லாமல் திரைத்துறைக்கு வந்தவன். நிறைய கஷ்டப்பட்டிருக்கிறேன். சினிமாவுக்கு வரும் எல்லோருமே கஷ்டப்பட்டு தான் வருகிறார்கள் .அதை சொல்லிக்காட்ட விரும்பவில்லை. ஆனால் எனக்கு நீங்கள் தந்த ஆதரவும் அன்பும் மிகப்பெரியது. உங்களது விமர்சனங்களும் கருத்துக்களும் தான் என்னை செதுக்கியது.
என்னுடைய குரு நீங்கள் தான். உங்கள் கருத்துக்களின் படிதான் என் ஒவ்வொரு படத்தையும் தீர்மானிக்கிறேன். உங்கள் எல்லோருக்கும் பிடிக்கும்படியான படம் செய்ய வேண்டும் .அதுவே என் விருப்பம். ஒவ்வொரு படமும் மாறுபட்ட களங்களில் வித்தியாசமாக இருக்க வேண்டும் என்று நினைக்கிறேன் அப்படித்தான் என் படங்களை தேர்ந்தெடுக்கிறேன்.
நித்தம் ஒரு வானம் படமே மூன்று பாத்திரங்கள் என்று நினைத்து தான் செய்தேன். இப்போது அதற்கு வரும் பாராட்டுக்கள் மனதிற்கு மிகுந்த சந்தோஷத்தை தந்துள்ளது. அடுத்தடுத்து மாறுபட்ட களங்களில் நிறைய படங்கள் செய்யவுள்ளேன்.
கிராமத்து கதையில் நடிக்க வேண்டுமென எனக்கும் ஆசை இருக்கிறது. இப்போது ஒரு படத்தில் பேசி வருகிறோம் விரைவில் கிராமத்து கதையில் என்னை பார்க்கலாம்.
எனக்கு இப்போதைக்கு கல்யாண பேச்சு இல்லை. ஆனால் வீட்டில் பார்த்து வைக்கும் திருமணம் என் குணத்திற்கு செட் ஆகாது.
அடுத்ததாக சரத்குமார் சாருடன் இணைந்து ஒரு திரில்லர் படத்தில் நடித்துள்ளேன். மேலும் சில படங்களில் ஒப்பந்தமாகியிருக்கிறேன். அது பற்றிய தகவல்கள் தயாரிப்பு தரப்பிலிருந்து அதிகாரப்பூர்வமாக வெளியாகும்”. என கூறினார்