பாகுபலி படத்திற்கு பின்னர் இந்திய அளவில் பேசப்படும் நாயகனாக மாறிவிட்ட பிரபாஸ் உலக அளவில் அனைவராலும் அறியப்படும் ஒரு பான் இந்திய ஹீரோவாக மாறிவிட்டார். அதை தொடர்ந்து அவரது படங்களுக்கான எதிர்பார்ப்பு ஒவ்வொரு படத்திற்குமே அதிகரித்து வருகிறது.
அதேசமயம் கடந்த சில மாதங்களுக்கு முன்பு அவரது நடிப்பில் வெளியான ராதே ஷ்யாம் திரைப்படம் அவரது ரசிகர்களின் எதிர்பார்ப்பை ஈடு செய்யத் தவறியது. இருந்தாலும் அடுத்தடுத்த தயாரிப்பில் உள்ள ஆதிபுருஷ் மற்றும் சலார் ஆகிய படங்கள் அந்த குறையை போக்கி பிரபாஸுக்கு வெற்றி படங்களாக அமையும் என்று சொல்லப்படுகிறது.
இதில் அவர் நடித்துவரும் ஆதிபுருஷ் படத்தின் டீசர் கடந்த சில வாரங்களுக்கு முன்பு வெளியாகி ராமாயண காவியத்தை பேண்டஸி கலந்து இந்த படம் உருவாகிறது என்பதை அந்த டீசர் அழகாக கூறியது. ராமனாக பிரபாஸ் நடிக்கிறார்.
இந்த படம் வரும் 2023 சங்கராந்தி பண்டிகை ரிலீஸாக வெளியாகும் என ஏற்கனவே அறிவிக்கப்பட்டிருந்தது. இந்த நிலையில் இதன் ரிலீஸ் தேதி தற்போது மாற்றப்பட்டு வரும் ஜூன் 16ஆம் தேதி வெளியாக உள்ளது என அறிவிக்கப்பட்டுள்ளது..
இதுகுறித்து படத்தயாரிப்பு நிறுவனம் கூறும்போது ஏற்கனவே சங்கராந்தி பண்டிகையில் இந்தப் படத்தை ரிலீஸ் செய்ய திட்டமிட்டு இருந்தாலும் நாம் உருவாக்கி வருவது ஒரு யுக புருஷன் பற்றிய காவியத்தை. அதனால் மிகச்சிறந்த விஷுவல்களுடன் இந்த படத்தை கொடுக்க வேண்டும் என்பதற்காக இந்த தாமதம் ஏற்பட்டுள்ளது என்று கூறியுள்ளார்.