பாகுபலி படத்தின் மூலம் தென்னிந்திய அளவில் மட்டுமல்லாது பாலிவுட்டிலும் மிகப்பெரிய அளவில் புகழ்பெற்ற நடிகராக மாறிவிட்டார். நடிகர் பிரபாஸ். அதனால் அவர் நடிக்கும் படங்கள் மீதான எதிர்பார்ப்பு எல்லா மொழி ரசிகர்களிடமும் அதிகமாகவே இருக்கிறது. அந்த வகையில் பாகுபலி படத்திற்கு பிறகு பிரபாஸ் நடிப்பில் வெளியான சாஹோ, ராதே ஷ்யாம் ஆகிய படங்கள் ரசிகர்களின் எதிர்பார்ப்பை ஈடுசெய்ய தவறின.
ஆனாலும் அடுத்ததாக அவர் பாலிவுட் இயக்குனர் ஓம் ராவத் இயக்கத்தில் நடித்துவரும் ஆதிபுருஷ் படத்தின் மீதான எதிர்பார்ப்பு ரசிகர்களிடம் நிறையவே இருக்கிறது. இந்த நிலையில் சமீபத்தில் இந்த படத்தின் டீசர் வெளியானது.
ராமாயண பின்னணியில் உருவாகியுள்ள இந்த கதை அனிமேஷன் கலந்து மிக பிரம்மாண்டமான படமாக உருவாகி வருகிறது என்பதை டீசரை பார்க்கும்போதே தெரிந்துகொள்ள முடிகிறது. அதேசமயம் இந்த டீசர் வெளியானதும் அதுகுறித்து கடும் விமர்சனங்களும் கிளம்பின. ஆனால் அதை எல்லாம் புறந்தள்ளிவிட்டு நடிகர் பிரபாஸ் இந்த ஆதிபுருஷ் படம் குறித்து உற்சாகமாகி உள்ளார்.
இந்த நிலையில் ஆதி புருஷ்’ டீஸர் குறித்து கமெண்ட் அடித்த பிரபாஸ்,” ‘ஆதி புருஷ்’ டீஸரை முதன்முதலில் 3டி’ எஃபெக்டில் பார்த்தபோது ஒரு குழந்தையாக மாறி பரவசமடைந்தேன். இந்த டீஸரை ஆந்திராவிலும், தெலங்கானாவிலும் ரசிகர்களுக்காக 60க்கும் மேற்பட்ட திரையரங்குகளில் வெளியிடத் திட்டமிட்டிருக்கிறோம்.
இது நிச்சயமாக திரையரங்குகளில் காணவேண்டிய ஒரு படம். இப்படத்திற்காக உங்கள் அன்பையும் ஆதரவையும் வேண்டிக்காத்திருக்கும் அதேவேளை அடுத்த 10 தினங்களுக்கு இப்படம் குறித்து பல சர்ப்ரைஸான கண்டெண்டுகளை வழங்கவிருக்கிறோம் என்பதையும் தெரிவித்துக்கொள்கிறேன்” என்கிறார்.
பல ஹீரோக்கள் தங்கள் படம் குறித்த தகவல்கள் குறித்து சஸ்பென்ஸ் காக்கும்போது, ‘அடுத்தடுத்த அப்டேட்களுக்கு நான் கியாரண்டி’ என்று பிரபாஸ் முன்வந்திருப்பது அவரது ரசிகர்களை குஷிப்படுத்தியுள்ளது