இயக்குனர் சுந்தர்.சி இயக்கத்தில் மிகப்பெரிய எதிர்பார்ப்புடன் உருவாகியுள்ள படம் காபி வித் காதல். ஜீவா ஸ்ரீகாந்த் ஆகியோர் கதாநாயகர்களாக நடிக்கும் இந்த படத்தில் மாளவிகா சர்மா, ரைசா வில்சன், அம்ரிதா ஐயர், ஐஸ்வர்யா தத்தா ஆகியோர் கதாநாயகிகளாக நடித்துள்ளனர். மேலும் யோகிபாபு, ரெடின் கிங்ஸ்லி, பிரதாப் போத்தன், திவ்யதர்ஷினி (டிடி), விச்சு விஸ்வநாத் சம்யுக்தா ஷண்முகம், அருணா பால்ராஜ், பேபி விர்த்தி ஆகியோர் முக்கிய வேடத்தில் நடித்துள்ளனர்.
இந்த படத்திற்கு யுவன் சங்கர் ராஜா இசையமைத்துள்ளார் கடந்த சில தினங்களுக்கு முன்பு இந்த படத்தின் இசை வெளியீட்டு விழா நடைபெற்றது. ஏற்கனவே அக்டோபர் 7ஆம் தேதி இந்த படம் வெளியாகும் என அறிவிக்கப்பட்டும் இருந்தது.
இந்தநிலையில் தற்போது இந்த படத்தின் ரிலீஸ் தேதி நவம்பர்-4க்கு தள்ளிவைக்கப்பட்டுள்ளது. கடந்த வாரம் திரையரங்குகளில் வெளியான பொன்னியின் செல்வன் திரைப்படம் மிகப்பெரிய வரவேற்பு பெற்று தற்போதும் 90 சதவிகித தியேட்டர்களில் அரங்கு நிறைந்த காட்சிகளாக வரவேற்புடன் ஓடிக்கொண்டிருக்கிறது.
இந்த நிலையில் காபி வித் காதல் திரைப்படத்திற்கு தயாரிப்பாளர்கள் தரப்பில் எதிர்பார்த்த அளவிற்கு திரையரங்குகள் கிடைக்க வாய்ப்பில்லை என்பதால் இதை வேறு ஒரு நாளில் ரிலீஸ் செய்தால் மட்டுமே இந்த படத்திற்கான முழு வரவேற்பை பெற முடியும் என முடிவு செய்து இந்த தேதியை மாற்றி அறிவித்துள்ளனர்.
பொன்னியின் செல்வன் படத்தைப் போலவே சுந்தர்.சியின் படங்களுக்கும் எப்போதுமே ரசிகர்கள் குடும்பம் குடும்பமாக தியேட்டருக்கு வருகை தந்து பார்த்து ரசிப்பார்கள் என்பதால் நிச்சயம் இந்த இடைவெளி தேவைதான் என்று திரையுலகிலும் ரசிகர்கள் மத்தியிலும் பேசப்பட்டு வருகிறது,.