இயக்குனர் ஷங்கர், கமல் கூட்டணியில் 26 வருடங்களுக்கு முன்பு உருவான இந்தியன் திரைப்படம் மிகப்பெரிய வெற்றிபெற்றது. இந்த நிலையில் கடந்த 2 வருடங்களுக்கு முன்பு இந்தப்படத்தின் இரண்டாம் பாகம் இந்தியன்2 என்கிற பெயரில் துவங்கியது.
படப்பிடிப்பில் நடைபெற்ற விபத்து மற்றும் கொரோனா தாக்கம் ஆகியவை காரணமாக இடையில் தற்காலிகமாக இந்தப்படம் நிறுத்தப்பட்டிருந்தது. இந்த நிலையில் சமீபத்தில் வெளியான விக்ரம் திரைப்படத்தின் வெற்றி, இந்தியன் 2 படத்தின் பணிகளை மீண்டும் விறுவிறுப்பாக துவங்க வைத்துள்ளது.
இந்த படத்தில் கதாநாயகிகளாக காஜல் அகர்வால், ரகுல் பிரீத் சிங், ப்ரியா பவானி சங்கர் ஆகியோர் நடிக்கின்றனர் இந்த படத்தின் படப்பிடிப்பு தற்காலிகமாக நிறுத்தப்பட்டிருந்த சமயத்தில்தான் நடிகை காஜல் அகர்வாலுக்கு திருமணம் நடைபெற்று பின்னர் குழந்தையும் பிறந்தது.
இந்த நிலையில் இந்த படத்தில் அவர் நடிப்பாரா என்கிற சந்தேகமும் ரசிகர்களுக்கு ஏற்பட்டது. ஆனால் அதை நிவர்த்தி செய்யும் விதமாக இந்தப் படத்தில் காஜல் அகர்வால் நடிக்கிறார் என்பது படக்குழுவினரால் உறுதி செய்யப்பட்டது.
இந்த நிலையில் இந்த படத்தில் காஜல் அகர்வால் தன்னுடைய கதாபாத்திரத்திற்காக குதிரையேற்ற பயிற்சி செய்யும் வீடியோ சோசியல் மீடியாவில் வெளியாகி வைரலாகி வருகின்றன.
சமீபத்தில்தான் குழந்தை பெற்ற காஜல் அகர்வால் குதிரைப்பயிற்சி போன்ற கடினமான விஷயங்களில் ஈடுபட்டு வருவது, சினிமாவின் மீதான அவரது அர்ப்பணிப்பை காட்டுகிறது என்று ரசிகர்கள் அவருக்கு புகழாரம் சூட்டி வருகின்றனர்.