கடந்த சில தினங்களுக்கு முன்பு மித்ரன் ஜவகர் இயக்கத்தில் தனுஷ் நடித்த திருச்சிற்றம்பலம் திரைப்படம் வெளியானது. இந்த படத்தில் கதாநாயகிகளாக நித்யா மேனன், ராசி கண்ணா, பிரியா பவானி சங்கர் ஆகியோரும் முக்கிய வேடங்களில் பிரகாஷ்ராஜ் மற்றும் பாரதிராஜா ஆகியோரும் நடித்திருந்தனர்.
ஒரு இளைஞனின் மனதில் ஒரே பருவத்தில் வெவ்வேறு சூழலில் அரும்பும் காதல் பற்றியும், உண்மையான காதல் எப்படி இறுதியில் வெற்றி அடைகிறது என்பது பற்றியும் ஒரு பீல் குட் படமாக ரொம்பவே ஜாலியாக இயக்கி இருந்தார் மித்ரன் ஜவகர். தனுஷ், நித்யா மேனன் இருவரும் படத்தை தாங்கி பிடிக்கும் தூணாக இருந்தார்கள்.
அதே சமயம் பாரதிராஜா, பிரகாஷ்ராஜ் மற்ற இரு கதாநாயகிகளும் எதார்த்தமான நடிப்பை வழங்கி படத்திற்கு இன்னும் பலம் சேர்த்தனர். இந்த படம் ரசிகர்களை மட்டும் அல்லாது பிரபலங்கள் பலரையும் கவர்ந்து விட்டது. அந்த வகையில் இந்த படத்தை பார்த்த இயக்குனர் ஷங்கர் தற்போது தனது பாராட்டுகளையும் தெரிவித்துள்ளார்.
இது குறித்து அவர் கூறும்போது, ‘திருச்சிற்றம்பலம் ஒரு அழகான படம். வலிகளைத் தொடர்ந்து வரும் அன்பான தருணங்களில் தான் அழகு இருக்கிறது. நித்யா மேனனின் கதாபாத்திரமும் அவரது நடிப்பும் இதயத்தை கொள்ளையடித்து விட்டது. அதேபோல தனுஷ் அனிருத் கூட்டணி வழக்கம் போல சூப்பர். மித்ரன் ஜவகர் இந்த படத்தை அழகாக எழுதி இருக்கிறார்” என பாராட்டியுள்ளார் ஷங்கர்.