தனுஷ் நடிப்பில் திரையரங்குகளில் வெளியான அசுரன், கர்ணன் ஆகிய படங்கள் ரசிகர்களிடம் மிகப்பெரிய வரவேற்பு பெற்றதுடன் வசூல் ரீதியாக மிகப்பெரிய சாதனைகளையும் படைத்தன. ரசிகர்கள் மட்டுமல்லாது பொதுமக்களும் குடும்பம் குடும்பமாக தியேட்டருக்கு வந்து பார்த்து ரசித்தனர்.
அதே சமயம் தனுஷ் நடிப்பில் வெளியான ஜகமே தந்திரம் ஹிந்தியில் அவர் நடித்த அட்ராங்கி மற்றும் ஹாலிவுட் நடித்த ஜர்னி ஆப் பக்கீர் மற்றும் சமீபத்தில் வெளியான கிரேமேன் ஆகிய படங்கள் ஓடிடி தளத்தில் வெளியாகி ரசிகர்களை முழுமையாக திருப்திப்படுத்த தவறியும் விட்டன.
இந்த நிலையில் தான் ஏற்கனவே தனுஷ் ரசிகர்களின் ஃபேவரைட் லிஸ்ட்டில் இடம் பிடித்திருக்கும் யாரடி நீ மோகினி என்கிற படத்தின் இயக்குனர் மித்ரன் ஜவகர் மீண்டும் தனுசை வைத்து இயக்கி இருக்கும் திருச்சிற்றம்பலம் திரைப்படம் வரும் ஆகஸ்ட்18 ஆம் தேதி வெளியாக இருக்கிறது.
இந்த படம் ரிலீஸ் ஆவதையொட்டி தனுஷ் ரசிகர்கள் இப்போது இருந்தே கொண்டாட்டத்திற்கு தயாராகி வருகின்றனர் என்பதை சோசியல் மீடியாவில் பார்க்க முடிகிறது.
ஏற்கனவே யாரடி நீ மோகினி, குட்டி, உத்தமபுத்திரன் என இந்த கூட்டணி தொடர்ந்து வெற்றி படங்களை கொடுத்து இருப்பதால் செண்டிமெண்டாக இந்த படமும் மிகப்பெரிய வெற்றி பெறும் ரசிகர்கள் எதிர்பார்க்கின்றனர்,
அது மட்டுமல்ல ஒரு நீண்ட இடைவெளிக்கு பிறகு மீண்டும் அனிருத் இந்த படத்தில் தனுஷ் உடன் கைகோர்த்துள்ளார் என்பதும் ரசிகர்களை உற்சாகப்படுத்தும் இன்னொரு காரணம்.
நித்யா மேனன், ராசி கண்ணா, பிரியா பவானி சங்கர் ஆகியோர் கதாநாயகிகளாக நடித்துள்ள இந்த படத்தில் பிரகாஷ்ராஜ், பாரதிராஜா ஆகிய முக்கிய வேடங்களில் நடித்துள்ளனர்.