கொம்பன் என்கிற வெற்றிப் படத்தை தொடர்ந்து இயக்குனர் முத்தையா டைரக்ஷனில் கார்த்தி நடித்துள்ள படம் விருமன். இந்த படத்தில் கதாநாயகியாக இயக்குனர் ஷங்கரின் மகள் அதிதி அறிமுகமாகியுள்ளார். யுவன் சங்கர் ராஜா இந்த படத்திற்கு இசையமைத்துள்ளார். இந்த படத்தின் பணிகள் அனைத்தும் கிட்டத்தட்ட முடிவடைந்து ஆகஸ்டு 31ஆம் தேதி வெளியாகும் என முதலில் அறிவிக்கப்பட்டிருந்தது.
இந்த நிலையில் முன்கூட்டியே அதாவது ஆகஸ்ட் 12-ம் தேதியே இந்த படம் வெளியாகிறது என தற்போது புதிய அறிவிப்பு வெளியாகியுள்ளது. கேரளாவிலும் கூட இதே தேதியில்தான் படம் வெளியாகிறது. இந்த படத்தை பார்ச்சூன் சினிமா நிறுவனம் வெளியிடுகிறது.
அதே சமயம் தமிழில் கார்த்தி படத்திற்கு இருக்கும் அளவிற்கு சற்றும் குறையாத ரசிகர்கள் தெலுங்கிலும் இருக்கின்றனர். அதனால் கார்த்தி படங்கள் தமிழில் வெளியாகும் அதே நாளில் தெலுங்கில் வெளியானது வழக்கமாக இருந்து வருகிறது. இந்த நிலையில் விருமன் படத்தின் தெலுங்கு பதிப்பு, தமிழ் பதிப்பு வெளியாகும் அதே நாளில் வெளியாகாது என்றும் சில நாட்கள் கழித்து வெளியாகும் என்றும் தற்போது ஒரு தகவல் திரையுலக வட்டாரத்தில் வெளியாகி உள்ளது.
காரணம் ஆகஸ்ட் 31ஆம் தேதி தமிழ் தெலுங்கு என ஒரே சமயத்தில் ரிலீஸ் செய்வதாக திட்டமிடப்பட்டிருந்தது. ஆனால் தற்போது தமிழில் முன்கூட்டியே ரிலீஸ் ஆவதால் தெலுங்கில் அதற்கான வெளியிடும் ஏற்பாடுகளை உடனடியாக செய்ய முடியாது என்பதாலேயே தெலுங்கு ரிலீஸ் தள்ளிப் போவதாக விநியோகஸ்தர்கள் வட்டாரத்தில் கூறப்படுகிறது.