நடிகர் விக்ரம் பிரபு ஆரம்ப காலகட்டத்தில் நல்ல கதைகளாக தேர்வு செய்து நடித்து வந்தார். இடையில் சில காலம் படத்தேர்வில் கவனம் சிதறி விட்டாரோ என்று சொல்லும் விதமாக அவரது படங்கள் தொடர்ந்து ரசிகனிடம் வரவேற்பு பெற தவறின. இந்த நிலையில் கடந்த சில மாதங்களுக்கு முன்பு வெளியான டாணாக்காரன் திரைப்படம் மீண்டும் விக்ரம் பிரபுவை வழக்கமான பார்முக்கு அழைத்து வந்துள்ளது.
மீண்டும் கதையும், கதாபாத்திர தேர்வும் தான் தன்னை சினிமாவில் நிலைநிறுத்தும் என்பதை உணர்ந்து கொண்ட விக்ரம் பிரபு அப்படி தேர்ந்தெடுத்துள்ள ஒரு படம் தான் ‘ரெய்டு’.
கார்த்திக் என்பவர் இயக்கும் இந்த படத்தின் கதாநாயகியாக ஸ்ரீதிவ்யா நடிக்கிறார். விக்ரம் பிரபுவும் ஸ்ரீதிவ்யாவும் வெள்ளக்கார துரை என்கிற படத்தில் இதற்குமுன் இணைந்து நடித்திருந்தார்கள் என்பது குறிப்பிடத்தக்கது.
அது மட்டுமல்ல இந்த படத்தில் புதுமுகம் அனந்திகா என்பவர் அறிமுகமாகிறார். இதில் என்ன ஹைலைட் என்றால் கிராமத்து ஆக்சன் படங்களை இயக்குவதற்கு பெயர் போன இயக்குனர் முத்தையா இந்த படத்திற்கு திரைக்கதை வசனம் எழுதியுள்ளார் என்பதுதான்.
அதுமட்டுமல்ல சமீபத்தில் இந்த படத்தில் விக்ரம் பிரபுவின் பர்ஸ்ட் லுக் போஸ்டர் வெளியானது இதற்கு ரசிகர்களிடையே மிகப்பெரிய வரவேற்பு கிடைத்துள்ளதுடன் படத்தின் தலைப்பும் பர்ஸ்ட் லுக் போஸ்டரும் படத்தின் மீதான எதிர்பார்ப்பை அதிகப்படுத்தி உள்ளது.