வெற்றி பெற்ற படங்களுக்கு இரண்டாம் பாகம் எடுக்கும் போக்கு பாகுபலி படம் வருவதற்கு முன், அதாவது சிங்கம், காஞ்சனா போன்ற படங்களின் இரண்டாம் பாகங்கள் மிகப்பெரிய வெற்றி அடைந்த சமயத்திலேயே உருவாகிவிட்டது. அந்தவகையில் தற்போது முன்னணி இயக்குனராக வலம் வரும் எச்.வினோத் முதன்முறையாக அறிமுக இயக்குனராக இயக்கிய சதுரங்க வேட்டை திரைப்படம் மிகப்பெரிய வெற்றியை பெற்றது. அந்த படத்தை இயக்குனர் மனோபாலா தயாரித்திருந்தார்.
அந்த படத்தின் வெற்றியை தொடர்ந்து அந்த படத்தின் இரண்டாம் பாகத்தையும் மனோபாலா தயாரித்தார். கதாநாயகனாக அரவிந்த்சாமி, கதாநாயகியாக த்ரிஷா என கலர்ஃபுல் கூட்டணியில் உருவான இந்தப்படத்தை இயக்குனர் நிர்மல் குமார் இயக்கியுள்ளார். மேலும் பிரகாஷ்ராஜ், டேனியில் பாலாஜி, நாசர், ராதாரவி, யோகிபாபு உள்ளிட்ட பலர் முக்கிய கதாபாத்திரங்களில் நடித்துள்ளனர்.
இந்த படம் துவங்கப்பட்டு சில பல தடங்கல்களுக்கு பிறகு ஒரு வழியாக படப்பிடிப்பு முடிந்து படமும் ரிலீஸ் ஆக தயாரானது. ஆனால் இடையில் பொருளாதார ரீதியாக ஏற்பட்ட பல சிக்கல்களுக்கு தீர்வு காண முடியாமல் சில முறை படத்தின் ரிலீஸ் தேதி அறிவிக்கப்பட்டும், ரிலீஸ் ஆக முடியாமல் தள்ளிப்போனது.
இந்த நிலையில் வரும் அக்டோபர் ஏழாம் தேதி இந்த படம் ரிலீஸ் ஆக இருப்பதாக அதிகாரப்பூர்வ அறிவிப்பு வெளியாகி உள்ளது. இந்த முறையாவது சொன்னபடி படம் வெளியாக வேண்டுமே என்று, சதுரங்க வேட்டை முதல் பாகத்தை ரசித்த ரசிகர்கள் அனைவரும் ஆவலுடன் காத்திருக்கின்றனர்.