சந்தானம் நகைச்சுவை நடிகராக இருந்து கதாநாயகனாக மாறிய பின்னர் அவரது காமெடி கலந்த பஞ்ச் டயலாக்குகள் அதிக அளவில் படங்களில் இடம் பெறுவது இல்லை என்கிற குறை ரசிகர்களிடம் இருக்கிறது. காமெடியனாக இருந்தபோது அவருக்கு ஒரு கட்டுப்பாடு எதுவும் இல்லாததால் விதவிதமான நகைச்சுவை காட்சிகளும் வசனங்களும் அவரிடமிருந்து கிடைத்தன. ஆனால் ஹீரோ என்கிற வட்டத்தில் அவர் நுழைந்த பிறகுதான் இப்படி மாற்றம் ஏற்பட்டுள்ளது நன்றாகவே தெரிகிறது.
இந்த நிலையில் இயக்குனர் ரத்தினகுமார் இயக்கத்தில் சந்தானம் நடித்துள்ள குலுகுலு திரைப்படம் வரும் ஜூலை 29 ஆம் தேதி வெளியாக இருக்கிறது. இந்த படத்தை உதயநிதியின் ரெட் ஜெயன்ட் மூவிஸ் நிறுவனம் வெளியிடுகிறது. சமீபத்தில் இந்த படத்தின் டீசர் வெளியானது.
இந்த டீசரில் முதல் பாதி நிமிடங்களில் சந்தானம் சம்பந்தப்பட்ட காட்சிகளே இடம்பெறவில்லை. இது ஒரு பக்கமிருக்க சந்தானம் அடுத்ததாக இடம்பெற்ற காட்சிகளிலும் அவர் பேசும் வசனங்கள் எதுவுமே இல்லாமல் இந்த டீசர் உருவாக்கப்பட்டுள்ளது.
சந்தானம் என்றாலே வசனங்கள்தான், நகைச்சுவை, நையாண்டி தான் என எதிர்பார்த்து இந்த குலுகுலு டீசரை பார்த்த ரசிகர்கள் இதனால் ஏமாற்றம் அடைந்துள்ளனர். படத்தில் இதற்கெல்லாம் சேர்த்து சந்தானம் விருந்து வைப்பார் என எதிர்பார்க்கலாம்.