தற்போது திரைப்படங்களுக்கு இணையாக வெப்சீரிஸ்கள் பிரபலம் ஆகி விட்டன. குறிப்பாக முன்னணி சினிமா நட்சத்திரங்கள் கூட சினிமா வெப்சீரிஸ் என பிரித்துப் பார்க்காமல் ரொம்பவே ஆர்வத்துடன் வெப்சீரிஸில் வரும் நடித்து வருகின்றனர். அந்த வகையில் தற்போது பிங்கர் டிப் சீசன்-2 என்கிற வெப்சீரிஸ் தயாராகியுள்ளது.
இதில் பிரசன்னா கதாநாயகனாக நடிக்க ரெஜினா கசாண்ட்ரா கதாநாயகியாக நடித்துள்ளார் இவர்களுடன் அபர்ணா பாலமுரளி, வினோத் கிஷன், மாரிமுத்து, கண்ணா ரவி, சரத் ரவி, திவ்யா துரைசாமி உள்ளிட்ட பலர் நடித்துள்ளனர்.
இந்தத் தொடரை சிவாகர் சீனிவாசன் என்பவர் இயக்கியுள்ளார். கண்ட நாள் முதல் என்கிற படத்தில் கதாநாயகி லைலாவின் தங்கையாக அறிமுகமான ரெஜினா, அந்த படத்தின் நாயகன் பிரசன்னாவுடன் கிட்டத்தட்ட 15 வருடங்கள் கழித்து இந்த வெப்சீரிஸில் இணைந்து நடித்துள்ளார். வரும் ஜூன் 17ஆம் தேதி முதல் இந்த வெப்சீரிஸ் ஒளிபரப்பாக இருக்கிறது.
இந்த வெப்சீரிஸ் ஒரு தொழில்நுட்ப த்ரில்லர் என்று கூறும் இயக்குனர் சிவாகர் நாம் தினமும் காண்பதை திரையில் காட்ட முயற்சித்து இருக்கிறோம் என்று கூறுகிறார்.
நடிகர் பிரசன்னா கூறும்போது, “பிங்கர் டிப் முதல் சீசன், மிகவும் ஆழமாகவும், ஈர்க்கும் வகையில் இருந்தது. அந்த தொடரின் இயக்குனர் என்னை அணுகி, இந்த கதையை சொன்ன போது எனக்கு இது ஒரு நல்ல வாய்ப்பாக தெரிந்தது. அனைவராலும் மொபைல் இல்லாமல் இருக்க முடியாத சூழ்நிலையில் நாம் வாழ்கிறோம். இன்றைக்கு தொழில்நுட்பம் நம்மை எவ்வளவு தூரம் கட்டுப்பாட்டில் வைத்திருக்கிறது, இதில் என்ன ஆபத்து இருக்கிறது என்பதை சொல்வது தான் இந்த தொடர். இந்த தொடரின் வெளியீட்டில் நான் ஆர்வமாய் இருக்கிறேன். இந்த தொடர் உங்களுக்கு பிடிக்கும் என்று நான் நம்புகிறேன்” என கூறியுள்ளார்..