அங்காடி தெரு படம் மூலம் நகைச்சுவை நடிகராக ரசிகர்கள் மத்தியில் பிரபலமானவர் பிளாக் பாண்டி. அதற்கு முன்னதாக கனா காணும் காலங்கள் தொடரில் நடித்து ஓரளவு ரசிகர்களுக்கு தெரிந்த முகமாக இருந்தார். அங்காடித்தெரு வெளியாகி கிட்டத்தட்ட 10 வருடங்களுக்கு மேல் ஆகிவிட்டது. தற்போது பல படங்களில் காமெடி நடிகராக நடித்து வருகிறார் பிளாக் பாண்டி.
இது ஒரு பக்கமிருக்க கடந்த இரண்டு வருடங்களுக்கு முன்பு உதவும் மனிதம் என்கிற அமைப்பை துவங்கி உதவி தேவைப்படும் ஏழை மக்கள் பலருக்கும் சத்தமில்லாமல் உதவி செய்து வருகிறார் பிளக் பாண்டி.
அன்னதானம், மருத்துவ உதவி, கல்வி உதவி, ரத்ததானம் உள்ளிட்ட ஏழை மக்களின் தேவைகளை தன்னால் இயன்றவரை உதவி செய்து தீர்த்து வைக்கிறார் இவரது இந்த முயற்சிக்கு பக்கபலமாக இயக்குனர் சமுத்திரக்கனியும் கைகோர்த்து இருக்கிறார். திடீரென இப்படி ஒரு உதவி அமைப்பை துவங்கி உதவி செய்ய வேண்டும் என்கிற எண்ணம் பிளாக் பாண்டிக்கு எப்படி ஏற்பட்டது ?
“எனது தாத்தா, எனது தந்தை அவர்கள் இதே போன்று மற்றவருக்கு உதவி செய்வதை பார்த்து வளர்ந்தவன் நான். அந்த விதை எனக்குள்ளும் விழுந்துவிட்டது. நன்றாக வளர்ந்து சம்பாதித்து பிறருக்கு உதவலாம் என நினைத்து இருந்தேன். சொல்லப்போனால் அஜித் சார் உதவி செய்வது யாருக்கும் தெரியாது என்று சொல்வார்களே அதுபோல..
ஆனால் நாம் எப்போது சம்பாதித்து எப்போது செட்டில் ஆவது எப்போது உதவி செய்வது என்கிற எண்ணம் தோன்றியதும் உதவும் நல்ல உள்ளங்களிடமிருந்து கூட தேவையானவற்றை பெற்று இல்லாதவர்களுக்கு கொடுக்கலாம் என்கிற யோசனை தோன்றியது. அப்படி ஆரம்பிக்கப்பட்டதுதான் இந்த உதவும் மனிதம் அமைப்பு.. இயன்றதை செய்வோம் இணைந்தே செய்வோம் என்பது தான் இதனுடைய கொள்கை” என்று கூறுகிறார் பிளாக் பாண்டி