இப்போதெல்லாம் ஜெய் நடிக்கும் படங்கள் அடுத்தடுத்து வெளியாகின்றன.. அவர் நடிக்கும் புதிய படங்களின் அறிவிப்புகள், நடித்து வரும் படம் பற்றிய செய்திகள் எல்லாம் சீரான இடைவெளியில் வெளியாகி வருகின்றன. எல்லாமே நடிகர் ஜெய்யிடம் காலம் செய்த மாற்றம் தான், தமிழ் சினிமாவில் தனக்கென ஒரு இடம் இருக்கிறது என்பதை புரிந்துகொண்டு இதற்கு முன்பு தான் செய்த விளையாட்டுத்தனங்களை எல்லாம் ஒதுக்கி வைத்துவிட்டு முழுமூச்சுடன் நடிப்பில் கவனம் செலுத்தி வருகிறார் ஜெய்.
அந்தவகையில் சமீபத்தில் சுசீந்திரன் இயக்கத்தில் அவர் நடித்த குற்றம் குற்றமே என்கிற திரைப்படம் நேரடியாக தொலைக்காட்சியில் வெளியானது. இந்த நிலையில் அடுத்து அவர் நடித்து வரும் படங்களில் ஒன்றான பிரேக்கிங் நியூஸ் படத்தின் படப்பிடிப்பு தற்போது நடைபெற்று வருகிறது. இந்த படத்தில் விமான சண்டை காட்சி ஒன்றும் இடம்பெறுகிறது.
இதற்காக விமானம் போலவே தத்ரூபமாக செட் உருவாக்கப்பட்டு இதில் ஜெய் எதிரிகளுடன் மோதும் சண்டைக்காட்சி படமாக்கப்பட்டது. இந்த செட்டை வடிவமைக்க மட்டுமே ஒரு கோடி ரூபாய் செலவானதாக கூறுகிறார் இயக்குனர் ஆண்ட்ரூ பாண்டியன்,
இந்த படத்தில் பானு ரெட்டி கதாநாயகியாக நடிக்க ராகுல் தேவ், தேவ் கில், சந்தானபாரதி, பழ கருப்பையா, ஜெயப்பிரகாஷ் உள்ளிட்ட பலர் முக்கிய வேடத்தில் நடித்து வருகின்றனர்.