கமல் ரசிகர்களின் நீண்டதொரு காத்திருப்புக்கு பிறகு கமல் நடிப்பில் விரைவில் வெளியாக உள்ள படம் விக்ரம். கைதி, மாஸ்டர் என அடுத்தடுத்த ஹிட் படங்களை தொடர்ந்து இயக்குனர் லோகேஷ் கனகராஜ் இயக்கத்தில் உருவாகியுள்ள இந்தப்படம் அறிவிக்கப்பட்ட நாளிலிருந்தே பல ஆச்சரியங்களையும் எதிர்பார்ப்புகளையும் ஏற்படுத்தி வருகிறது.
குறிப்பாக இந்த படத்தில் நடிகர் விஜய்சேதுபதி, மலையாள நடிகர் பஹத் பாசில், நரேன், காளிதாஸ் ஜெயராம் என பல முன்னணி நட்சத்திரங்கள் இணைந்து நடித்து இருப்பது படத்தின் மீதான ஆர்வத்தை அதிகரிக்கச் செய்துள்ளது. அதுமட்டுமல்ல அனிருத்தின் இசை இந்த படத்திற்கு இன்னொரு புதிய பரிமாணம் கொடுக்கும் என்று நம்பலாம்.
வரும் ஜூன் 3ஆம் தேதி இந்த படம் வெளியாக இருக்கிறது என ஏற்கனவே அறிவிக்கப்பட்டுள்ளது. இந்நிலையில் இந்த படத்தை தமிழகமெங்கும் வெளியிடும் உரிமையை உதயநிதி ஸ்டாலினின் ரெட் ஜெயன்ட்ஸ் நிறுவனம் கைப்பற்றியுள்ளது.
கலைஞர் பிறந்தநாளான ஜூன் 3ஆம் தேதி வெளியாகும் இந்த படத்தை அவரது பேரன் உதயநிதி ஸ்டாலின் தமிழ்நாட்டில் வெளியிடுவது மிகப்பொருத்தமான ஒன்று.