முன்னெல்லாம் பேய்களை, அதாவது பேய் படங்களில் வரும் பேய்களையும் அவற்றின் செயல்களையும் பார்த்து பயந்துபோய் கண்களை இறுக மூடிக்கொண்டு படம் பார்த்த காலம் மலையேறிவிட்டது. இப்போது பேய்களை பயமுறுத்தி விரட்டும் புதிய ட்ரெண்டு உருவாகி உள்ளது. ஒரு பக்கம் இயக்குனர் சுந்தர்.சி தொடர்ந்து பேய்களை வைத்து ரசிகர்களை பயமுறுத்தி கொண்டிருக்க, இன்னொரு பக்கம் தில்லுக்கு துட்டு இயக்குனர் ராம்பாலா பேய்களையே டார்ச்சர் செய்யும் விதமாக முழுக்க முழுக்க காமெடி ஜானரில் படங்களை இயக்கி வருகிறார்.
அந்த வகையில் தற்போது மிர்ச்சி சிவாவை வைத்து அவர் இயக்கியுள்ள படம் இடியட். இந்த படத்தில் நிக்கி கல்ராணி கதாநாயகியாக நடிக்க ரெடின் கிங்ஸ்லி, கருணாகரன் ஆகியோர் முக்கிய வேடங்களில் நடித்துள்ளனர். வரும் ஏப்ரல்-1ஆம் தேதி இந்த படம் வெளியாக உள்ள நிலையில் இந்த படத்தின் ஸ்னீக் பீக் என ஒரு நிமிட காட்சி தற்போது வெளியாகியுள்ளது.
அதில் தங்களை பின் தொடர்ந்து வரும் பேயையே மரண கலாய் கலாய்த்து பேய்களை கடுப்பாக்கும் விதமாக சிவாவும் ரெடின் கிங்ஸ்லியும் நடித்துள்ளனர். நிச்சயம் 100 சதவீத காமெடிக்கு கியாரண்டி தரும் படமாக இந்த இடியட் இருக்கும் என்பது சந்தேகமில்லாமல் தெரிகிறது.