கமல், மோகன்லால் இணைந்து நடித்த உன்னைப்போல் ஒருவன் படத்தில் மோகன்லாலின் கீழ் பணிபுரியும் துடிப்பான போலிஸ் அதிகாரியாக நடித்து, யார் இந்த மனிதன் என கேட்க வைத்தவர் நடிகர் கணேஷ் வெங்கட்ராம். அதற்கு முன்னதாக திரிஷாவுக்கு ஜோடியாக அபியும் நானும் படத்தில் பஞ்சாபி இளைஞனாக நடித்து அசத்தினார். அதன்பிறகு சில படங்களில் கதாநாயகனாக நடித்தவர், பிக்பாஸ் நிகழ்ச்சியில் கலந்து கொண்டு இன்னும் அதிக அளவில் ரசிகர்களை சென்றடைந்தார்.
தற்போது அனைத்து மொழி திரைத்துறையிலும் பிஸியாக இயங்கி வரும் கணேஷ் வெங்கட்ராம் தமிழில் “உன் பார்வையில் மற்றும் ரெட் சாண்டல்வுட்” படங்களிலும், தெலுங்கில் இரு படங்களிலும் பணிபுரிந்து வருகிறார். அடுத்ததாக முன்னணி ஓடிடி தளம் தயாரிக்கும் புதிய பொலிடிகல் திரில்லர் தொடரில் நடிக்கவுள்ளார்.
நடிகர் கணேஷ் வெங்கட்ராம் எப்போதும் சமூகநல நோக்குடன் செயல் பட்டு வருகிறார். பொதுபிரச்சனைகளிலும் தனது கருத்தை அழுத்தமாக தெரிவித்து வருகிறார்.
இந்த நிலையில் இன்று பிறந்தநாள் கொண்டாடிய கணேஷ் வெங்கட்ராம் கோவளம் கடற்கரையை சுத்தப்படுத்தும் முயற்சியில் இறங்கினார். இந்த நிகழ்வில் இவருடன் நிறைய மாணவர்களும் இளைஞர்களும் கலந்து கொண்டனர்.