கடந்த பத்து வருடங்களில் அஜித் நடித்த படங்களை கவனித்துப் பார்த்தால் அதில் நான்கு படங்களை இயக்குனர் சிவாவும் இரண்டு படங்களை ஹெச்.வினோத்தும் இயக்கி இருப்பதை தெரிந்துகொள்ள முடியும். அந்தவகையில் தனக்கு பிடித்தமான இயக்குனர்களுடன் குறைந்தபட்சம் இரண்டு படங்களிலாவது தொடர்ந்து பயணிக்க விரும்புகிறார் நடிகர் அஜித். தற்போது வலிமை படத்தை தொடர்ந்து அடுத்த படத்திற்காக புதிய கூட்டணியாக நம்பிக்கை தரும் இயக்குனர் விக்னேஷ் சிவனுடன் இணைந்துள்ளார் அஜித்..
இந்தப் படத்தை லைக்கா நிறுவனம் தயாரிக்கிறது. அனிருத் இந்தப்படத்திற்கு இசை அமைக்கிறார். ஏற்கனவே என்னை அறிந்தால் படத்தில் அஜித்துக்காக அதாரு அதாரு என்கிற பாடலையும் சமீபத்தில் வெளியான வலிமை படத்தில் அம்மா என்கிற பாடலையும் எழுதியிருந்த விக்னேஷ் சிவன் இப்போது சர்ப்ரைஸ் கிப்ட் ஆக அஜித் படத்தை இயக்கும் வாய்ப்பை பெற்றுள்ளார் என்பது ஆச்சரியமான விஷயம்தான். சிறுத்தை சிவா, ஹெச்.வினோத் போல விக்னேஷ் சிவனும் அஜித்தின் ஆஸ்தான இயக்குனர்கள் பட்டியலில் இடம் பிடிப்பார் என நம்புவோம்.