தர்மதுரை என்கிற படத்தின் மூலம் இயக்குனர் சீனு ராமசாமியும் விஜய்சேதுபதியும் இணைந்து தமிழக ரசிகர்களின் மனதை கொள்ளையடித்தனர். இதேபோல இன்னொரு உணர்வுபூர்வமான படத்தை இருவரும் சேர்ந்து தர மாட்டார்களா என்று ஏங்க வைக்கும் அளவிற்கு அந்த படம் அமைந்திருந்தது. ரசிகர்களின் எதிர்பார்ப்பை நிறைவேற்றும் விதமாக மாமனிதன் என்கிற படத்தில் மீண்டும் விஜய்சேதுபதியை வைத்து சீனுராமசாமி இயக்கியுள்ளார்.
இந்தப்படத்தில் விஜய்சேதுபதி ஆட்டோ டிரைவராக நடித்துள்ளார். தேனி ஆண்டிபட்டி பகுதிகளில் இந்த படத்தின் படப்பிடிப்பு முழுவதும் நடைபெற்றது. இசைஞானி இளையராஜாவும் அவரது மகன் யுவன் ஷங்கர் ராஜாவும் இணைந்து இந்தப்படத்தில் பணியாற்றியுள்ளனர் என்பது இந்தப்படத்தின் இன்னொரு சிறப்பு.
ஆனால் கடந்த இரண்டு வருடங்களுக்கும் மேலாக இந்த படம் சில காரணங்களால் வெளிவர தாமதம் ஆகிக்கொண்டே வந்தது. இந்த நிலையில் தர்மதுரை படத்தை தயாரித்த தயாரிப்பாளரும் இயக்குனருமான ஆர்கே.சுரேஷ் மாமனிதன் படத்தை தனது ஸ்டுடியோ 9 சார்பாக தமிழ்நாட்டில் வெளியிட இருக்கிறார். இதன்மூலம் மாமனிதன் படத்திற்கு விமோசனம் கிடைத்துள்ளது என்றே சொல்லலாம்.