பிரபாஸ், பூஜா ஹெக்டே நடிப்பில் காதல் கதையாக உருவாகியுள்ள ராதே ஷ்யாம் படம் நாளை மறுநாள் (மார்ச் 11) வெளியாக இருக்கிறது. ராதா கிருஷ்ணகுமார் இந்த படத்தை இயக்கியுள்ளார். பான் இந்தியா ரிலீஸ் என்பதால் தென்னிந்திய சினிமா நகரங்களில் எல்லாம் ராதே ஷ்யாம் படக்குழுவினர் புரமோஷன் நிகழ்ச்சிகளை நடத்தி வருகின்றனர்.
அந்த வகையில் கேரளாவில் நேற்று நடைபெற்ற இந்த படத்தின் புரமோஷன் நிகழ்ச்சியில் கலந்துகொண்டு நடிகர் பிரபாஸ் பேசும்போது நடிகர் பிரித்விராஜ் சலார் படத்தில் தன்னுடன் இணைந்து நடிப்பதை உறுதி செய்தார்.
கேஜிஎப், கேஜிஎப்-2 படங்களை தொடர்ந்து இயக்குனர் பிரசாந்த் நீல் இயக்கும் இந்த படத்தில் ஏற்கனவே பிரித்விராஜ் ஒரு கதாபாத்திரத்தில் நடிக்கலாம் என சொல்லப்பட்டு வந்த நிலையில், தற்போது அதை பிரபாஸ் தானே வெளிப்படுத்தியுள்ளார்.
இந்த படத்தில் பிரித்விராஜ் போன்ற நடிகர் நடிப்பது மகிழ்ச்சி தரும் விஷயம். நாங்கள் கேட்டதும் அவர் பெருந்தன்மையுடன் ஒப்புக்கொண்டார் என்று பிரபாஸ் கூறினார். அந்தவகையில் இந்த படத்தில் பிரித்விராஜ் வில்லன் கதாபாத்திரத்தில் நடிப்பதற்கு அதிக வாய்ப்பு இருப்பதாகவே தெரிகிறது.