தமிழ் நட்சத்திரங்கள் பலர் தங்களது படங்களை பான் இந்தியா ரிலீசாக வெளியிடும் முயற்சியில் இருக்க, விஜய் சேதுபதியோ தென் இந்தியாவையும் தாண்டி பாலிவுட்டில் கால் பதித்து இந்தியா நடிகராகவே மாறிவிட்டார். இப்படி பிஸியாக நடித்து வரும் வேளையிலும் ஒரு படத்திற்கு திரைக்கதை வசனம் எழுதி இருக்கிறார் என்றால் அது உண்மையிலேயே ஆச்சரியமான விஷயம் தான். இது இயக்குனர் சரவண சக்தி மற்றும் படத்தின் ஹீரோவாக நடிக்கும் விமலின் நட்புக்காக அவர் செய்த செயல்.
ஜேகே ரித்தீஷ் நடித்த நாயகன், ஆர்கே சுரேஷ் நடித்த பில்லா பாண்டி ஆகிய படங்களை இயக்கிய நகைச்சுவை நடிகரும் இயக்குனருமான சரவண சக்தி இந்த படத்தை இயக்கி வருகிறார் இதில் விமல் கதாநாயகனாக நடிக்க தன்யா ஹோப் கதாநாயகியாக நடித்துள்ளார். இந்த படத்தின் படப்பிடிப்பு தற்போது நிறைவடைந்துள்ளது. இந்த படத்தின் டைட்டில் மற்றும் பர்ஸ்ட் லுக் போஸ்டர் விரைவில் வெளியாகும் என அறிவிக்கப்பட்டுள்ளது.