கிட்டத்தட்ட பத்து வருடங்களுக்கு மேல் தமிழ் திரையுலகில் முன்னணி காமெடி நடிகராக வலம் வந்தவர் சந்தானம். ஒரு கட்டத்தில் கதாநாயகன் ஆகும் தனது லட்சியத்திற்காக, பீக்கில் இருந்த சமயத்திலேயே துணிந்து முடிவெடுத்து ஹீரோவாக நடிக்கத் துவங்கினார்.. அந்த துணிச்சலுக்கு பரிசாக தற்போது தயாரிப்பாளர்களின் மினிமம் கியாரண்டி ஹீரோவாக வெற்றி வலம் வந்து கொண்டிருக்கிறார் சந்தானம்
இன்று சந்தானத்தின் பிறந்தநாள்.. வழக்கமாக பிரபலங்களின் பிறந்தநாளன்று அவர்களது படங்களின் ஃபர்ஸ்ட்லுக் போஸ்டர், டீசர் என ஏதாவது ஒன்று வெளியாவது வழக்கம். அந்தவகையில் சந்தானத்திற்கு பிறந்தநாள் பரிசு தரும் விதமாக அவர் தற்போது நடித்துள்ள, விரைவில் வெளிவர இருக்கும் ஏஜென்ட் கண்ணாயிரம் படத்தின் டீசரை வெளியிட்டுள்ளனர் படக்குழுவினர்.
வித்தியாசமான முறையில் உருவாக்கப்பட்டுள்ள டீசர் ரசிகர்களிடம் வரவேற்பை பெற்று வருகிறது. இது சந்தானத்திற்கு கிடைத்த பரிசு என்றால் சந்தானத்தின் ரசிகர்களுக்கு கிடைத்த பரிசாக அவர் அடுத்ததாக நடிக்க இருக்கும் படம் குறித்த தகவல் ஒன்று வெளியாகியுள்ளது
ஆம். முதன்முறையாக கன்னட இயக்குனர் பிரசாந்த் ராஜ் என்பவர் தமிழில் இயக்கும் படம் ஒன்றில் கதாநாயகனாக நடிக்க இருக்கிறார் சந்தானம்.. இந்த தகவலை சந்தானமும் அதிகாரப்பூர்வமாக உறுதி செய்துள்ளார்.