சூர்யா நடிப்பில் உருவாக இருக்கும் ‘வாடிவாசல்’ படத்தின் டைட்டில் லுக் வெளியாகியுள்ளது.
வெற்றிமாறன் மற்றும் சூர்யா கூட்டணியில் உருவாக இருக்கும் ‘வாடிவாசல்’ படத்தின் டைட்டில் லுக் தற்போது வெளியாகியுள்ளது.
போஸ்டரில் அரசர் காலத்தில் பயன்படுத்தப்பட்ட நாணயம் இடம் பெற்றுள்ளது. அந்த நாணயத்தில் ஜல்லிக்கட்டு காளை இடம் பெற்றுள்ளது. மேலும் அந்த நாணயம் சிறிது உருகுலைந்தால் போல் காணப்படுகிறது.
“நம் வரலாறு மற்றும் துணிச்சலைக் குறிக்கும் ஒரு சின்னம், வாடிவாசல் படத்தின் டைட்டில் போஸ்ட்டரை முன்வைப்பதில் நான் மிகவும் மகிழ்ச்சியடைகிறேன், பெருமைப்படுகிறேன்” என்று கலைப்புலி எஸ். தாணு தெரிவித்துள்ளார்.
வாடிவாசல் படத்திற்கு கோலிவுட்டில் அதிக எதிர்பார்ப்பு நிலவி வருகிறது. வாடிவாசல் திரைப்படம் வாடிவாசல் என்ற நாவலை மையமாக வைத்து எடுக்கப்படுகிறது. இந்தப் படத்திற்காக சூர்யா ஜல்லிக்கட்டு காளைகளுடன் தீவிரமாக பயிற்சி எடுத்து வருவதாகக் கூறப்படுகிறது. வாடிவாசல் படத்திற்கு ஜிவி பிரகாஷ் இசையமைக்கிறார். கலைப்புலி எஸ். தாணு தயாரிக்கிறார். கதாநாயகி குறித்த அப்டேட் இதுவரை வெளியாகவில்லை.
சூர்யா தற்போது பாண்டிராஜ் இயக்கத்தில் புதிய படத்தில் நடித்து வருகிறார். வெற்றிமாறன் தற்போது சூரியை கதாநாயகனாக வைத்து ‘விடுதலை’ படத்தை இயக்கி வருகிறார். இருவரும் தாங்கள் தற்போது பணியாற்றி வரும் படங்களை முடித்த பின்னர் வாடிவாசல் படத்தில் இணைவார்கள் என்று எதிர்பார்க்கப்படுகிறது. மேலும் வரும் ஜூலை 23-ம் தேதி சூர்யாவின் பிறந்தநாள் என்பதால் அன்றும் வாடிவாசல் படத்திலிருந்து புதிய அப்டேட் கிடைக்கலாம் என்றும் எதிர்பார்க்கப்படுகிறது.