அஜய் ஞானமுத்து இயக்கத்தில் விக்ரம் நடித்துள்ள படம் கோப்ரா. ஏ.ஆர்.ரகுமான் இசையமைத்துள்ள இந்த படத்தில் கேஜிஎஃப் புகழ் ஸ்ரீநிதி ஷெட்டி கதாநாயகியாக நடிக்க, இன்னும் இரண்டு கதாநாயகிகளாக மீனாட்சி மற்றும் மிருணாளினி ரவி ஆகிய நடித்துள்ளனர். முக்கிய வேடங்களில் கே.எஸ்.ரவிக்குமார், ஆனந்த்ராஜ், ரோபோ சங்கர், மலையாள நடிகர் ரோஷன் மேத்யூ, கிரிக்கெட் வீரர் இர்பான் பதான் ஆகியோர் நடித்துள்ளனர்.
வரும் ஆகஸ்ட் 31ஆம் தேதி இந்தப்படம் வெளியாக உள்ள நிலையில் திருச்சி, மதுரை என புரமோஷன் நிகழ்ச்சிகளில் பம்பரமாக சுற்றி வருகிறார் நடிகர் விக்ரம்.
அந்த வகையில் இன்று மதுரையில் அமெரிக்கன் கல்லூரியில் நடைபெற்ற புரமோஷன் நிகழ்ச்சியில் விக்ரம் பேசும்போது, “மதுரை வந்தாலே மீசை தானாகவே முறுக்குகிறது. அதற்கு உங்கள் அன்பு தான் காரணம். என் தந்தை இந்த கல்லூரியில் தான் படித்தார். இந்த படத்தின் இயக்குனர் அஜய் ஞானமுத்து உங்கள் ஊர்க்காரர்தான். அவர் இயக்கியுள்ள படம்தான் என்றாலும், படத்தின் இறுதிக்கட்டப் பணிகளால் அவரால் இந்த நிகழ்ச்சிக்கு வர முடியவில்லை. கோப்ரா படத்தைப் பொறுத்தவரை எமோஷன், காமெடி, ஆக்சன் எல்லாம் கலந்து நிறைய புதுமைகளும் சேர்ந்து இதில் இருக்கிறது. நிச்சயம் உங்களுக்கு படம் பிடிக்கும்” என்று பேசினார்.